മധ്യപ്രദേശിൽ മദ്യപിച്ച് വാഹനമോടിച്ച ബിജെപി നേതാവിന്റെ കാർ പാഞ്ഞുകയറി രണ്ട് മരണം

ഭോപ്പാൽ: മധ്യപ്രദേശിൽ ബിജെപി നേതാവ് ഓടിച്ച കാർ തീ കായാൻ ഇരുന്നവർക്കിടയിലേക്ക് പാഞ്ഞുകയറി രണ്ട് പേർ കൊല്ലപ്പെട്ടു. ശനിയാഴ്ച പുലർച്ചെ മധ്യപ്രദേശിലെ ഇൻഡോറിലാണ് സംഭവം. ബിജെപി പ്രാദേശിക നേതാവ് സുമിത് മിശ്രയാണ് വാഹനം ഓടിച്ചിരുന്നതെന്ന് പൊലീസ് സ്ഥിരീകരിച്ചു.

തണുപ്പിൽ നിന്ന് രക്ഷനേടാൻ റോഡരികിൽ തീ കൂട്ടി അതിനു ചുറ്റും ഇരിക്കുകയായിരുന്നു ഒരു സംഘം ആളുകൾ. നിയന്ത്രണം വിട്ട കാർ അതിവേഗത്തിൽ ഇവരുടെ ഇടയിലേക്ക് പാഞ്ഞുകയറുകയായിരുന്നു. അപകടത്തിൽ രണ്ട് പേർ സംഭവസ്ഥലത്ത് വെച്ച് തന്നെ മരിച്ചു. മൂന്ന് പേർക്ക് ഗുരുതരമായി പരിക്കേറ്റിട്ടുണ്ട്.

ഇവരെ സമീപത്തെ ആശുപത്രിയിൽ പ്രവേശിപ്പിച്ചു. മദ്യലഹരിയിലെന്ന് ആരോപണം അപകടസമയത്ത് ബിജെപി നേതാവ് മദ്യപിച്ചിരുന്നതായി നാട്ടുകാർ ആരോപിച്ചു. അപകടത്തിന് ശേഷം ഓടി രക്ഷപ്പെടാൻ ശ്രമിച്ച സുമിത് മിശ്രയെ നാട്ടുകാർ തടഞ്ഞുവെച്ച് പൊലീസിൽ ഏൽപ്പിച്ചു.

പ്രതിയെ വൈദ്യപരിശോധനയ്ക്ക് വിധേയനാക്കിയതായും അമിതവേഗതയ്ക്കും അശ്രദ്ധമായ ഡ്രൈവിംഗിനും കേസെടുത്തതായും പൊലീസ് അറിയിച്ചു. സംഭവത്തിൽ കർശന നടപടി സ്വീകരിക്കുമെന്ന് സംസ്ഥാന സർക്കാർ ഉറപ്പുനൽകി.

എന്നാൽ, ഭരണകക്ഷി നേതാക്കൾ നിയമം കൈയ്യിലെടുക്കുകയാണെന്ന് ആരോപിച്ച് പ്രതിപക്ഷം രംഗത്തെത്തി. സംഭവത്തിൽ ദുരൂഹതയുണ്ടെന്നും വിശദമായ അന്വേഷണം വേണമെന്നും കൊല്ലപ്പെട്ടവരുടെ കുടുംബാംഗങ്ങൾ ആവശ്യപ്പെട്ടു.