ഭോജ്ശാല സരസ്വതി ക്ഷേത്രമെന്ന് മധ്യപ്രദേശ് ഹൈക്കോടതി; മുസ്ലിംകൾക്ക് നിസ്‌കാരാനുമതി നൽകിയ ഉത്തരവ് റദ്ദാക്കി

ഇൻഡോർ: മധ്യപ്രദേശിലെ ധാർ ജില്ലയിലുള്ള വിവാദ ഭോജ്ശാല-കമാൽ മൗല സമുച്ചയ കേസിൽ നിർണ്ണായക വിധിയുമായി ഹൈക്കോടതി. ഈ പ്രദേശം സരസ്വതി ദേവിക്ക് സമർപ്പിച്ചിരിക്കുന്ന ക്ഷേത്രമാണെന്നാണ് മധ്യപ്രദേശ് ഹൈക്കോടതിയുടെ നിരീക്ഷണം.

ഇരുവിഭാഗങ്ങളും അവകാശവാദമുന്നയിക്കുന്ന ഈ സമുച്ചയവുമായി ബന്ധപ്പെട്ട കേസുകൾ പരിഗണിക്കുന്നതിനിടെയാണ് കോടതിയുടെ ഈ സുപ്രധാന ഉത്തരവ്. ഹിന്ദുക്കൾ സരസ്വതി ദേവിയുടെ ക്ഷേത്രമായി കാണുന്ന ഈ പ്രദേശത്തെ മുസ്ലിം വിഭാഗം കമാൽ മൗല പള്ളിയായാണ് കണക്കാക്കുന്നത്.

എന്നാൽ, ഇവിടെ മുസ്ലിംകൾക്ക് നിസ്‌കരിക്കാൻ അനുമതി നൽകിയിരുന്ന ആർക്കിയോളജിക്കൽ സർവേ ഓഫ് ഇന്ത്യയുടെ 2003 ഏപ്രിൽ 7-ലെ ഉത്തരവ് ഹൈക്കോടതി പൂർണ്ണമായും റദ്ദാക്കി.

ഭോജ്ശാല സമുച്ചയത്തിൽ മുൻപ് ഒരു വലിയ സംസ്‌കൃത പഠന കേന്ദ്രവും സരസ്വതി ദേവിയുടെ ക്ഷേത്രവും നിലനിന്നിരുന്നതിന്റെ വ്യക്തമായ സൂചനകളും തെളിവുകളും ഉണ്ടെന്ന് ജസ്റ്റിസുമാരായ വിജയ് കുമാർ ശുക്ല, അലോക് അവസ്തി എന്നിവരടങ്ങിയ ഡിവിഷൻ ബെഞ്ച് നിരീക്ഷിച്ചു.

ചരിത്ര സ്മാരകത്തിന്മേലുള്ള ഹിന്ദുക്കളുടെ അവകാശവാദം പൂർണ്ണമായി അംഗീകരിക്കുന്നതിനൊപ്പം തന്നെ, മുസ്ലിം സമൂഹത്തിന്റെ മതപരമായ അവകാശങ്ങൾ സംരക്ഷിക്കാനും ഹൈക്കോടതി നിർദ്ദേശിച്ചിട്ടുണ്ട്.

ഇതിന്റെ ഭാഗമായി, മുസ്ലിം വിഭാഗം അപേക്ഷ സമർപ്പിക്കുകയാണെങ്കിൽ ധാർ ജില്ലയിൽ പുതിയ പള്ളി നിർമ്മിക്കുന്നതിനായി അനുയോജ്യമായ പകരം ഭൂമി മധ്യപ്രദേശ് സർക്കാർ അനുവദിക്കുന്നതിനെക്കുറിച്ച് പരിഗണിക്കണമെന്നും ജഡ്ജിമാരായ വിജയ് കുമാർ ശുക്ല, അലോക് അവസ്തി എന്നിവരുടെ ബെഞ്ച് ഉത്തരവിൽ വ്യക്തമാക്കി.

കോടതി വിധിയുടെ പശ്ചാത്തലത്തിൽ മധ്യപ്രദേശിലെ ധാർ ജില്ലയിലും പരിസര പ്രദേശങ്ങളിലും ക്രമസമാധാനം ഉറപ്പാക്കാൻ അതീവ ജാഗ്രതാ നിർദ്ദേശമാണ് പുറപ്പെടുവിച്ചിട്ടുള്ളത്. ഹൈക്കോടതി വിധിക്കെതിരെ മുസ്ലിം വ്യക്തിനിയമ ബോർഡും മസ്ജിദ് കമ്മിറ്റിയും സുപ്രീംകോടതിയെ സമീപിക്കുമെന്നാണ് റിപ്പോർട്ടുകൾ.