ജാതി സെൻസസ് റിപ്പോർട്ട് അം​ഗീകരിച്ച് കർണാടക മന്ത്രിസഭ

ബം​ഗളൂരൂ : വിവാദമായ ജാതി സെൻസസ് റിപ്പോർട്ട് അം​ഗീകരിച്ച് കർണാടക മന്ത്രിസഭ. ഏപ്രിൽ 17ന് നടക്കുന്ന യോ​ഗത്തിൽ റിപ്പോർട്ടിനെപ്പറ്റി വിശദമായി ചർച്ച ചെയ്യും. ആറ് മന്ത്രിമാർ യോ​ഗത്തിൽ പങ്കെടുത്തില്ല. 2015ൽ കർണാടക പിന്നാക്കവിഭാ​ഗ കമീഷൻ നടത്തിയ സർവേ റിപ്പോർട്ടാണ് ഇന്ന് മന്ത്രിസഭ അം​ഗീകരിച്ചത്. എച്ച് കാന്തരാജിന്റെ നേതൃത്വത്തിൽ ആരംഭിച്ച സർവേ കെ ജയപ്രകാശാണ് പൂർത്തീകരിച്ചത്. മുദ്രവച്ച കവറിലാണ് റിപ്പോർട്ട് സമർപ്പിച്ചത്.

വിവിധ ജതി- മത വിഭാ​ഗങ്ങളെപ്പറ്റിനടത്തിയ പഠനറിപ്പോർട്ടിൽ 50 അധ്യായങ്ങളുണ്ട്. ഇതിന്റെ കോപ്പി എല്ലാ മന്ത്രിമാർക്കും നൽകുമെന്ന് പിന്നാക്ക ക്ഷേമ വിഭാ​ഗ മന്ത്രി ശിവരാജ് തങ്കാഡ​ഗി പറഞ്ഞു. സർവേ നടത്തിയത് കാര്യക്ഷമമായല്ലെന്നു കാട്ടി ലിം​ഗായത്ത്, വൊക്കലിം​ഗ വിഭാ​ഗങ്ങൾ രം​ഗത്തെത്തിയിരുന്നു. ഭാരത് ഇലക്ട്രോണിക്സുമായി ചേർന്നാണ് ഡാറ്റകൾ ക്രമീകരിച്ചത്.

2015ൽ കർണാടകയിലെ ജനസംഖ്യ 6.35 കോടി ആയിരുന്നുവെന്നും സർവേയിൽ 5.98 കോടി ജനങ്ങളെ പരി​ഗണിച്ചതെന്നുമാണ് മന്ത്രി അറിയിച്ചത്. 37 ലക്ഷം പേർ മാത്രമാണ് സർവേ വിവരങ്ങളിൽ നിന്ന് പുറത്തായതെന്നുംന്നും ഇത് ആകെ ജനസംഖ്യയുടെ 5.83 ശതമാനം മാത്രമേ ഉണ്ടാകുമെന്നും മന്ത്രി പറഞ്ഞിരുന്നു. 162 കോടി രൂപ ചിലവിൽ 1,60,000 ഔദ്യോ​ഗിക പ്രതിനിധികളാണ് സർവേ നടത്തിയത്.