എണ്ണയും മധുരവും ഹാനികരം; ജിലേബിക്കും സമൂസയ്ക്കും മുന്നറിയിപ്പ് ബോർഡുകൾ സ്ഥാപിക്കും

ന്യൂഡൽഹി: അമിതമായി എണ്ണയും മധുരവുമുള്ള ഭക്ഷണസാധനങ്ങളിൽ മുന്നറിയിപ്പ് നിർദേശം നടപ്പാക്കാനൊരുങ്ങി കേന്ദ്ര ആരോ​ഗ്യമന്ത്രാലയം. ഭക്ഷണ സാധനങ്ങളിൽ എത്രമാത്രം എണ്ണക്കൊഴുപ്പും പഞ്ചസാരയുമുണ്ടെന്നും കേന്ദ്രസർക്കാരിന് കീഴിലുള്ള സ്ഥാപനങ്ങളിൽ മുന്നറിയിപ്പ് ബോർഡ് സ്ഥാപിക്കും. നാ​ഗ്പൂർ എയിംസ് ഉൾപ്പെടെയുള്ള സ്ഥാപനങ്ങൾക്ക് ബോർഡുകൾ സ്ഥാപിക്കാൻ നിർദേശം നൽകിക്കഴിഞ്ഞു.

സി​ഗരറ്റ് കവറിൽ നൽകുന്ന മുന്നറിയിപ്പുകൾക്ക് സമാനമായി എണ്ണയുടെയും മധുരത്തിന്റെയും അമിത ഉപയോ​ഗം തടയാൻ പ്രചരണം ആരംഭിക്കുകയാണ് ലക്ഷ്യമിടുന്നതെന്ന് ദേശീയ മാധ്യമങ്ങൾ റിപ്പോർട്ട് ചെയ്തു. ഭക്ഷണശാലകളിലും പൊതുസ്ഥലങ്ങളിലും സർക്കാർ സ്ഥാപനങ്ങളിലും മുന്നറിയിപ്പ് ബോർഡുകൾ വെക്കും. സമൂസ, ജിലേബി, ലഡു, വടപാവ് പോലുള്ള ലഘുഭക്ഷണങ്ങളിൽ അടങ്ങിയിരിക്കുന്ന ആരോ​ഗ്യത്തിന് ഹാനികരമായ വസ്തുക്കളെക്കുറിച്ച് ജാ​ഗ്രത നിർദേശം നൽകും.

ഇന്നത്തെകാലത്തെ പുകയിലയാണ് പഞ്ചസാരയും കൊഴുപ്പും. എന്താണ് തങ്ങൾ കഴിക്കുന്നതെന്ന് ജനങ്ങൾ ബോധവാന്മാരേകണ്ടത് അനിവാര്യമാണെന്ന് കാർഡിയോളജിക്കൽ സൊസൈറ്റി ഓഫ് ഇന്ത്യ നാ​ഗ്പൂർ ഘടകം പ്രസിഡന്റ് ഡോ.അമർ അമാലെ ടൈംസ് ഓഫ് ഇന്ത്യയോട് പ്രതികരിച്ചു.