ഇന്നും 50 വിമാനങ്ങൾ റദ്ദാക്കി ഇൻഡിഗോ; വലഞ്ഞ് യാത്രക്കാർ

ന്യൂഡൽഹി: സാങ്കേതിക തടസ്സങ്ങളും ജീവനക്കാരുടെ ക്ഷാമവും മൂലം ഇൻഡിഗോ എയർലൈൻസ് ഇന്നും 50 സർവീസുകൾ റദ്ദാക്കി. ഏതാനും ആഴ്ചകളായി തുടരുന്ന വിമാന സർവീസുകളിലെ അനിശ്ചിതത്വം ഇന്നും തുടരുന്നത് രാജ്യത്തെ വിവിധ വിമാനത്താവളങ്ങളിൽ വലിയ യാത്രാക്ലേശത്തിന് കാരണമായി.

മുൻകൂട്ടി അറിയിക്കാതെ വിമാനങ്ങൾ റദ്ദാക്കിയതിനെത്തുടർന്ന് വിമാനത്താവളങ്ങളിൽ യാത്രക്കാർ പ്രതിഷേധിച്ചു. കഴിഞ്ഞ ദിവസങ്ങളിലും സമാനമായ രീതിയിൽ നിരവധി വിമാനങ്ങൾ ഇൻഡിഗോ റദ്ദാക്കിയിരുന്നു. ശൈത്യകാലത്തെ കടുത്ത മഞ്ഞുവീഴ്ചയും ചില വിമാനങ്ങളുടെ എഞ്ചിൻ തകരാറുമാണ് ഇതിന് കാരണമായി എയർലൈൻ അധികൃതർ നേരത്തെ വിശദീകരിച്ചിരുന്നത്.

എന്നാൽ തുടർച്ചയായുണ്ടാകുന്ന ഈ റദ്ദാക്കലുകൾ വിമാനക്കമ്പനിയുടെ പ്രവർത്തനത്തിലെ പിഴവാണെന്ന് യാത്രക്കാർ ആരോപിക്കുന്നു. വിമാനങ്ങൾ റദ്ദാക്കിയതിനെത്തുടർന്ന് മറ്റു വിമാനങ്ങളിലേക്ക് ടിക്കറ്റ് മാറ്റുന്നതിനോ പണം തിരികെ ലഭിക്കുന്നതിനോ കൗണ്ടറുകളിൽ എത്തിയ യാത്രക്കാർക്ക് മണിക്കൂറുകളോളം കാത്തുനിൽക്കേണ്ടി വന്നു.

കണക്റ്റിംഗ് ഫ്ലൈറ്റുകൾ നഷ്ടപ്പെട്ടവരും വിദേശയാത്രയ്ക്ക് എത്തിയവരുമാണ് ഏറെയും ബുദ്ധിമുട്ടുന്നത്. പല വിമാനത്താവളങ്ങളിലും എയർലൈൻ സ്റ്റാഫും യാത്രക്കാരും തമ്മിൽ വാക്കേറ്റമുണ്ടായി. ആഗോളതലത്തിൽ വിമാന എഞ്ചിനുകൾക്കുണ്ടായ ക്ഷാമം ഇൻഡിഗോയുടെ വലിയൊരു വിഭാഗം വിമാനങ്ങളെ ബാധിച്ചിട്ടുണ്ട്.

നിരവധി വിമാനങ്ങൾ നിലവിൽ സർവീസ് നടത്താൻ കഴിയാതെ ഗ്രൗണ്ട് ചെയ്തിരിക്കുകയാണ്. ഇതിനു പുറമെ പൈലറ്റുമാരുടെയും ക്യാബിൻ ക്രൂവിന്റെയും ജോലി സമയവുമായി ബന്ധപ്പെട്ട പ്രശ്നങ്ങളും സർവീസുകളെ ബാധിക്കുന്നുണ്ട്. പ്രശ്ന പരിഹാരത്തിന് സിവിൽ ഏവിയേഷൻ മന്ത്രാലയം ഇടപെടണമെന്ന ആവശ്യം ശക്തമാണ്.

വരും ദിവസങ്ങളിലും സർവീസുകളിൽ മാറ്റമുണ്ടാകാൻ സാധ്യതയുള്ളതിനാൽ യാത്രക്കാർ വിമാനത്താവളത്തിലേക്ക് പുറപ്പെടുന്നതിന് മുൻപ് ഫ്ലൈറ്റ് സ്റ്റാറ്റസ് പരിശോധിക്കണമെന്ന് ഇൻഡിഗോ അറിയിച്ചു.