സൈനികശക്തി വർധിപ്പിക്കാൻ ഇന്ത്യ; മിസൈലുകളും ഡ്രോണുകളും വരുന്നു

ന്യൂഡൽഹി : ഇന്ത്യയുടെ സൈനിക ശക്തി വർധിപ്പിക്കാനൊരുങ്ങി കേന്ദ്ര സർക്കാർ. പ്രതിരോധ സംഭരണ പദ്ധതികൾക്കായി 2.38 ലക്ഷം കോടി രൂപയാണ് കേന്ദ്രം അനുവദിച്ചത്. രാജ്യത്തിന്റെ പ്രതിരോധശേഷിയും സൈനിക ശേഷിയും വർധിപ്പിക്കുന്നതിനുള്ള നീക്കത്തിന്റെ ഭാ​ഗമായാണ് പുതിയ നടപടി. ഡിഫൻസ് അക്വിസിഷൻ കൗൺസിലാണ് പുതിയ പദ്ധതിക്ക് അം​ഗീകാരം നൽകിയത്.

കരസേന, വ്യോമസേന, കോസ്റ്റ് ഗാർഡ് എന്നിവക്ക് അത്യാധുനിക ആയുധങ്ങളും സംവിധാനങ്ങളും വാങ്ങാനുള്ള 'അക്‌സപ്റ്റൻസ് ഓഫ് നെസസിറ്റി'ക്കുള്ള അംഗീകാരമാണ് നൽകിയത്. പ്രതിരോധ മന്ത്രി രാജ്നാഥ് സിങിന്റെ അധ്യക്ഷതയിൽ ചേർന്ന ഡിഫൻസ് അക്വിസിഷൻ കൗൺസിൽ യോഗത്തിലാണ് ഇക്കാര്യത്തിൽ തീരുമാനമായത്.

എസ്-400 മിസൈൽ സംവിധാനങ്ങൾ, ഇടത്തരം ഗതാഗത വിമാനങ്ങൾ, ആക്രമണ ഡ്രോണുകൾ, ആധുനിക പീരങ്കികൾ എന്നിവ പദ്ധതിയിൽ ഉൾപ്പെടുന്നുണ്ട്. ആയുധം വാങ്ങുന്നതിനും വികസിപ്പിക്കുന്നതിനുമുള്ള ഏറ്റവും പ്രധാനപ്പെട്ട ആദ്യത്തെ കടമ്പയാണിപ്പോൾ കടന്നത്. പുതിയ തീരുമാനങ്ങൾ ഇന്ത്യയുടെ പ്രതിരോധ സന്നദ്ധത വർധിപ്പിക്കുമെന്ന് പ്രതിരോധ മന്ത്രി വ്യക്തമാക്കി.