എച്ച്‌1 ബി വിസ : യുഎസ് ഭീഷണിക്ക് കേന്ദ്രം വഴങ്ങരുത്- സിപിഐ എം

ന്യൂഡൽഹി: എച്ച്‌1 ബി വിസ ഫീസ്‌ 88 ലക്ഷം രൂപയായി ഭീമമായി വർധിപ്പിച്ച അമേരിക്കൻ ട്രംപ്‌ ഭരണകൂടത്തിന്റെ പ്രതികാരപരമായ നടപടിയെ സിപിഐ എം പൊളിറ്റ്‌ബ്യൂറോ അപലപിച്ചു. മറ്റ്‌ രാഷ്‌ട്രങ്ങളുടെ ചെലവിൽ സ്വന്തം വ്യാപാര താൽപര്യം സംരക്ഷിക്കാനുള്ള അമേരിക്കയുടെ ഭീഷണികളുടെ മറ്റൊരു ഉദാഹരണമാണിത്‌.

50 ശതമാനം പ്രതികാരച്ചുങ്കവും ഇറാനിൽ ഇന്ത്യ നടത്തുന്ന ചബാഹർ തുറമുഖത്തിന്‌ ഉപരോധവും ഏർപ്പെടുത്തിയതിന്‌ പിന്നാലെയാണിത്‌. ഉഭയകക്ഷി വ്യാപാര ചർച്ചകൾ പുനഃരാരംഭിച്ചതിന്‌ ശേഷമുള്ള നീക്കം അന്യായമായ യുഎസ് തീരുവകൾക്ക്‌ വഴങ്ങാൻ ഇന്ത്യയെ നിർബന്ധിക്കാൻ ഉദ്ദേശിച്ചുള്ളതാണ്‌. ഇത്തരം ഉരുക്കുമുഷ്‌ടി തന്ത്രങ്ങളെ പ്രതിരോധിക്കുന്നതിന്‌ പകരം സ്വാശ്രയത്വത്തിന്റെ ആവശ്യകതയെക്കുറിച്ചുള്ള അവ്യക്തമായ പ്രസംഗങ്ങൾ മാത്രമാണ്‌ പ്രധാനമന്ത്രി നരേന്ദ്രമോദി നടത്തുന്നത്‌. രാഷ്‌ട്രത്തലവന്റെ ഇ‍ൗ ഒഴിഞ്ഞുമാറൽ നിരാശാജനകവും അപമാനകരവുമാണ്. യുഎസ്‌ പ്രഖ്യാപനം ആയിരക്കണക്കിന് വിദഗ്‌ധ ഇന്ത്യൻ തൊഴിലാളികളെ നേരിട്ടുബാധിക്കും.

അവരുടെ കരിയറിന്‌ വിഘാതം സൃഷ്‌ടിക്കും. കുടുംബങ്ങളുടെ ഉപജീവനമാർഗത്തെ ബാധിക്കും. അന്യായമായ യുഎസ്‌ സമ്മർദത്തിന്‌ വഴങ്ങാതെ ശക്തമായ നിലപാട് സ്വീകരിച്ച്‌ ഇന്ത്യൻ ജനതയുടെ അവകാശങ്ങളും താൽപ്പര്യവും സംരക്ഷിക്കാൻ കേന്ദ്രസർക്കാർ തയ്യാറാകണം –പിബി ആവശ്യപ്പെട്ടു.