മുൻ കോൺ​ഗ്രസ് എംപി സജ്ജൻ കുമാർ അന്തരിച്ചു; അന്ത്യം സിഖ്‌ വംശഹത്യ കേസിൽ ജയിലിലായിരിക്കെ

ന്യൂഡൽഹി : മുൻ കോൺ​ഗ്രസ് എം പി സജ്ജൻ കുമാർ (80) അന്തരിച്ചു. 1984ലെ സിഖ് വിരുദ്ധ കലാപത്തിൽ ജീവപര്യന്തം തടവിന് ശിക്ഷിക്കപ്പെട്ട് ജയിലിൽ കഴിയുകയായിരുന്നു. തിഹാർ ജയിലിൽ വച്ച് ദേഹാസ്വാസ്ഥ്യമുണ്ടായതിനെത്തുടർന്ന് ഉടൻതന്നെ സഫ്ദർജങ് ആശുപത്രിയിലെത്തിച്ചെങ്കിലും മരിച്ചു.

ഔട്ടൽ ഡൽഹിയിൽ നിന്ന് മൂന്ന് തവണ ലോക്സഭാ​ഗമായ സജ്ജൻ കുമാർ 2018ലാണ് കോൺ​ഗ്രസിൽ നിന്ന് രാജി വയ്ക്കുന്നത്. 2018 ഡിസംബർ 17-നാണ് കേസിൽ കുമാറിനെ കുറ്റവിമുക്തനാക്കിയ വിചാരണ കോടതിയുടെ 2013 ലെ വിധി ഡൽഹി ഹൈക്കോടതി റദ്ദാക്കിയത്. തുടർന്ന് സജ്ജൻ കുമാറിനെ കുറ്റക്കാരനെന്ന് കണ്ടെത്തി ജീവപര്യന്തം തടവിന് ശിക്ഷിച്ചു.

1984 ഒക്ടോബർ 31-ന് മുൻ പ്രധാനമന്ത്രി ഇന്ദിരാഗാന്ധിയെ വധിച്ചതിനെത്തുടർന്നാണ് രാജ്യത്ത് കലാപം പൊട്ടിപ്പുറപ്പെട്ടത്. ഡൽഹിയിലുടനീളം സായുധ സംഘങ്ങൾ സിഖുകാരെ ലക്ഷ്യം വച്ച് നടത്തിയ ആക്രമണത്തിൽ 3,000-ത്തിലധികം സിഖുകാർ കൊല്ലപ്പെട്ടു. ഇന്ദിര ഗാന്ധിയുടെ കൊലപാതകത്തിന്‌ പിന്നാലെ രാജ്യതലസ്ഥാനത്ത്‌ പൊട്ടിപ്പുറപ്പെട്ട സിഖ്‌ വിരുദ്ധ സംഘർഷങ്ങൾക്ക്‌ നേതൃത്വം നൽകിയത്‌ സജ്ജൻകുമാർ ഉൾപ്പടെയുള്ള കോൺഗ്രസ്‌ നേതാക്കളായിരുന്നു.

കലാപത്തെത്തുടർന്ന് 1984 നവംബറിൽ പാകോളനിയിലെ രാജ് നഗർ പാർട്ട്-1-ൽ അഞ്ച് പേരുടെ കൊലപാതകം, ഗുരുദ്വാര കത്തിച്ച കേസ്, ക്രിമിനൽ ഗൂഢാലോചന, പ്രേരണ എന്നീ കുറ്റങ്ങൾക്കാണ് സജ്ജൻ കുമാർ കുറ്റക്കാരനാണെന്ന് ഹൈക്കോടതി വിധിച്ചത്. 1984 ലെ സിഖ് വിരുദ്ധ അക്രമത്തെ "മനുഷ്യത്വത്തിനെതിരായ കുറ്റകൃത്യങ്ങൾ" എന്നാണ് കോടതി വിധിയിൽ വിശേഷിപ്പിച്ചത്.