ആർഎസ്‌എസ്‌ പരിപാടിക്ക്‌ ആളെയിറക്കണം; ഡൽഹി സർവകലാശാലയിൽ വിവാദ സർക്കുലർ

ന്യൂഡൽഹി: ആർഎസ്‌എസ്‌ സംഘടനയായ രാഷ്‌ട്രീയ സേവാഭാരതിയുടെ പരിപാടിയിൽ പങ്കെടുക്കണമെന്ന്‌ ആവശ്യപ്പെട്ട്‌ സർക്കുലർ ഇറക്കിയ ഡൽഹി സർവകലാശാല നടപടിയിൽ പ്രതിഷേധം.

ഞായറാഴ്‌ച ഡൽഹി ജവഹർലാൽ നെഹ്‌റു സ്റ്റേഡിയത്തിൽ നടക്കുന്ന പരിപാടിയിൽ പങ്കെടുക്കാൻ വിദ്യാർഥികളോടും അധ്യാപകരോടും നിർദേശിക്കണമെന്നാണ്‌ രജിസ്ട്രാറുടെ സർക്കുലർ. സർവകലാശാലയ്‌ക്ക്‌ കീഴിലുള്ള കോളേജുകളിലെ പ്രിൻസിപ്പൽമാര്‍ക്കും വിവിധ വകുപ്പ്‌ മേധാവികൾക്കുമാണ്‌ നിർദേശം. പെൺകുട്ടികളുടെ വിദ്യാഭ്യാസം, ആരോഗ്യം എന്നിവയിൽ അവബോധം വളർത്തുകയാണ്‌ പരിപാടിയുടെ ലക്ഷ്യമെന്നും കോളേജുകളിലെ വിദ്യാർഥിക്ഷേമ ഫണ്ടിൽനിന്ന്‌ പരിപാടിയിൽ പങ്കെടുക്കാൻ പണം കണ്ടെത്തണമെന്നും നിർദേശമുണ്ട്‌.

ആർഎസ്‌എസ്‌ പരിപാടിയെ പിന്തുണയ്‌ക്കുന്നതും വിദ്യാർഥികൾക്കുള്ള ഫണ്ട്‌ അനാവശ്യമായി ചെലവഴിക്കുന്നതുമായ സർവകലാശാല നടപടിക്കെതിരെ അധ്യാപകരും വിദ്യാർഥികളും രംഗത്തെത്തി.