29 വർഷത്തെ ഒളിവുജീവിതം, ഒടുവിൽ പിടിയിൽ; 1997ലെ കൊലപാതകത്തിൽ പ്രതി അറസ്റ്റിൽ

ന്യൂഡൽഹി: കൊലപാതകക്കേസിൽ പതിറ്റാണ്ടുകാലം ഒളിവിൽ കഴിഞ്ഞ പ്രതി ഡൽഹി പൊലീസ് ക്രൈംബ്രാഞ്ചിന്റെ പിടിയിൽ. 1997ൽ ഡൽഹിയിൽ വെച്ച് സഹപ്രവർത്തകനെ അടിച്ചുകൊലപ്പെടുത്തിയ ശേഷം മുങ്ങിയ പ്രതിയെയാണ് 29 വർഷങ്ങൾക്ക് ശേഷം പൊലീസ് കൃത്യമായ ആസൂത്രണത്തിലൂടെ വലയിലാക്കിയത്. 'അലി ഭായ്' എന്നറിയപ്പെടുന്ന മുഹമ്മദ് ഫഹിം ആണ് പിടിയിലായ പ്രതി.

1997-ൽ ഡൽഹിയിൽ വെച്ച് 58 കാരനായ ഷെരീഫ് ഹസൻ ഖാൻ എന്ന സഹപ്രവർത്തകനെ കൊലപ്പെടുത്തിയ കേസിലെ മുഖ്യപ്രതിയാണ് മുഹമ്മദ് ഫഹിം. ഡൽഹിയിലെ ഒരു നിർമ്മാണ സൈറ്റിൽ ജോലി ചെയ്തിരുന്ന പ്രതിയും സഹപ്രവർത്തകനും തമ്മിൽ ശക്തമായ വാക്കുതർക്കമുണ്ടായി. പിടിക്കപ്പെടാതിരിക്കാൻ ഡിജിറ്റൽ അടയാളങ്ങൾ പൂർണ്ണമായും ഒഴിവാക്കുകയും വിലാസങ്ങൾ നിരന്തരം മാറ്റുകയും ചെയ്തായിരുന്നു ഇയാളുടെ ഒളിവുജീവിതം.

തർക്കം കൈയാങ്കളിയിലെത്തുകയും, പ്രകോപിതനായ പ്രതി ക്രൂരമായ മർദ്ദനത്തിലൂടെ സഹപ്രവർത്തകനെ കൊലപ്പെടുത്തുകയുമായിരുന്നു. കൊലപാതകം നടന്നയുടൻ തന്നെ ഇയാൾ സംഭവസ്ഥലത്തുനിന്ന് മുങ്ങി. അക്കാലത്ത് ഡൽഹി പോലീസ് വിപുലമായ അന്വേഷണം നടത്തിയെങ്കിലും പ്രതിയെക്കുറിച്ച് യാതൊരു വിവരവും ലഭിച്ചില്ല. തുടർന്ന് കോടതി ഇയാളെ 'പിടികിട്ടാപ്പുള്ളി'യായി പ്രഖ്യാപിച്ചിരുന്നു.

സ്വന്തം പേരിൽ മൊബൈൽ കണക്ഷനുകളോ ഫോണുകളോ ഇയാൾ ഉപയോഗിച്ചിരുന്നില്ല. ഉത്തരേന്ത്യയിലെ വിവിധ സംസ്ഥാനങ്ങളിലായി നിരന്തരം ഇയാൾ താമസം മാറി. ഒരിടത്തും സ്വന്തമായി തിരിച്ചറിയൽ രേഖകൾ നൽകിയിരുന്നില്ല. പ്ലാസ്റ്റർ ഓഫ് പാരീസ് ഉപയോഗിച്ച് വീടുകളുടെയും കെട്ടിടങ്ങളുടെയും ഉള്ളിൽ ഡിസൈനുകളും വിഗ്രഹങ്ങളും നിർമ്മിക്കുന്ന തൊഴിലാണ് ഇയാൾ ചെയ്തുവന്നിരുന്നത്. വലിയ കമ്പനികളിലോ കരാറുകളിലോ ഏർപ്പെടാതെ ദിവസക്കൂലിക്ക് ഇത്തരം ജോലികൾ ചെയ്താണ് ഇയാൾ ജീവിച്ചുപോന്നത്.

പ്രതി ഉത്തരേന്ത്യയിൽ ഒളിവിൽ കഴിയുന്നുണ്ടെന്ന രഹസ്യവിവരം ഡൽഹി പോലീസ് ക്രൈംബ്രാഞ്ചിന് ലഭിച്ചതോടെയാണ് കേസിൽ വഴിത്തിരിവുണ്ടാകുന്നത്. ഇയാളെ തിരിച്ചറിയുന്നതിനായി ക്രൈംബ്രാഞ്ച്, പ്രത്യേക സംഘം രൂപീകരിച്ച് രഹസ്യ നിരീക്ഷണം നടത്തിവരികയായിരുന്നു.

പഴയ രേഖകളിലെ ശാരീരിക അടയാളങ്ങളും നിലവിലെ വിവരങ്ങളും ഒത്തുനോക്കി ഉറപ്പുവരുത്തിയ ശേഷം പോലീസ് സംഘം ഇയാളെ വളഞ്ഞ് പിടികൂടുകയായിരുന്നു. അറസ്റ്റ് രേഖപ്പെടുത്തിയ പ്രതിയെ ഡൽഹിയിലെത്തിച്ച് കോടതിയിൽ ഹാജരാക്കി. ഇയാളെ കൂടുതൽ ചോദ്യം ചെയ്യുന്നതിലൂടെ ഒളിവുകാലത്ത് സഹായിച്ചവരെക്കുറിച്ചും കൂടുതൽ വിവരങ്ങൾ പുറത്തുകൊണ്ടുവരാൻ സാധിക്കുമെന്നാണ് പോലീസ് കരുതുന്നത്.