കനത്ത മഴ ; ഡാർജിലിങ്ങിൽ മണ്ണിടിച്ചിൽ , 28 മരണം

കൊൽക്കത്ത

ബംഗാളിലെ വടക്കൻ ജില്ലകളിൽ കനത്ത മഴയിലും മണ്ണിടിച്ചിലിലും 28 പേർ മരിച്ചു. നിരവധി പേർക്ക് പരിക്കുണ്ട്‌. പലരുടേയും നില ഗുരുതരം. വ്യാപകമായ നാശനഷ്‌ടമാണുണ്ടായത്‌. ഡാർജിലിങ്, ജാൽപായ്ഗുരി, അലിപ്പുർദ്വാർ ജില്ലകളിലാണ് മഴ രൂക്ഷം. നദികൾ കരകവിഞ്ഞു. ഡാർജിലിങ്‌, മിരിക്‌ പർവത മേഖലകളിൽ നിരവധിയിടങ്ങളിൽ മണ്ണിടിഞ്ഞു. വീടുകളും റോഡുകളും തകർന്നു. നിരവധി ഗ്രാമങ്ങൾ ഒറ്റപ്പെട്ടു. സിലിഗുരിയിലേക്കുള്ള പാതയിലെ ഇരുമ്പ് പാലം തകർന്നു.

ശനിയാഴ്‌ച രാത്രിയാണ്‌ മേഖലയിൽ മഴ ശക്തമായത്‌. 12 മണിക്കൂറിൽ 300 മില്ലി മീറ്റർ മഴ പെയ്‌തു. തിങ്കളാഴ്‌ചവരെ അതിശക്തമായ മഴയ്‌ക്ക്‌ സാധ്യതയുള്ളതിനാൽ റെഡ്‌ അലർട്ട്‌ പ്രഖ്യാപിച്ചിട്ടുണ്ട്‌. ദുരന്തനിവാരണ സേനയും സൈന്യവും രക്ഷാപ്രവർത്തനത്തിന്‌ രംഗത്തിറങ്ങി. ദുർഗാപൂജയ്‌ക്ക്‌ ശേഷം വൻതോതിൽ ഡാർജിലിങ്ങിലെത്തിയ സഞ്ചാരികൾ പലയിടത്തും കുടുങ്ങി.

ഭൂട്ടാനിലും കനത്ത മഴയും വെള്ളപൊക്കവും തുടരുകയാണ്‌. പല നദികളും കരകവിഞ്ഞത്‌ ബംഗാളിലെ വെള്ളപ്പൊക്ക സാഹചര്യം രൂക്ഷമാക്കുമെന്നതിനാൽ ജാഗ്രത നിർദേശമുണ്ട്‌.

മഴക്കെടുതിയെ ഗുരുതര പ്രകൃതി ദുരന്തമായി പ്രഖ്യാപിക്കണമെന്ന്‌ കേന്ദ്ര–സംസ്ഥാന സർക്കാരുകളോട്‌ സിപിഐ എം ഡാർജിലിങ്‌ ജില്ലാ കമ്മിറ്റി പ്രസ്‌താവനയിൽ ആവശ്യപ്പെട്ടു.