യുവതി തടങ്കലിലെന്ന് സംശയം; ഭർത്താവിന്റെ ഹർജിയിൽ അന്വേഷണത്തിന് ഉത്തരവ്

കൊച്ചി : തടങ്കലിലുള്ള ഭാര്യയെ മോചിപ്പിക്കണമെന്ന്​ ആവശ്യപ്പെട്ട് തമിഴ്‌നാട് വൈദ്യുതി ബോർഡ് റിട്ട. ഉദ്യോഗസ്ഥൻ ഹൈക്കോടതിയിൽ ഹർജി നൽകി. ഭാര്യ ഗ്വാളിയർ സ്വദേശിയായ ശ്രദ്ധ ലെനിനെ (44) മണ്ണുത്തി സ്വദേശി ജോസഫ് സ്റ്റീവൻ തടവിൽവച്ചിരിക്കുന്നതായി ആരോപിച്ചാണ് ഹേബിയസ് കോർപ്പസ് ഹർജി നൽകിയത്. വിഷയം ഗൗരവമേറിയതാണെന്ന് വിലയിരുത്തിയ ജസ്റ്റിസ് ദേവൻ രാമചന്ദ്രൻ, ജസ്റ്റിസ് എം ബി സ്നേഹലത എന്നിവരുൾപ്പെട്ട ഡിവിഷൻ ബെഞ്ച് എത്രയുംവേഗം യുവതിയെ കണ്ടെത്താൻ പൊലീസിന് നിർദേശം നൽകി.

ഭാര്യ ഇടയ്ക്കിടെ കേരളത്തിൽ വരാറുണ്ടെന്നും അപ്പോൾ കുടുംബസുഹൃത്തായ ജോസഫിനൊപ്പമാണ് താമസിക്കാറെന്നും ഹർജിയിൽ പറയുന്നു. കഴിഞ്ഞ ഏപ്രിലിൽ കൊച്ചിയിൽവച്ചാണ് ഭാര്യയെ അവസാനം കണ്ടത്. മെയ് 17ന് വാട്സാപ് ചാറ്റുകളും നിലച്ചു. ജൂൺ ആദ്യം അഭിഭാഷകനെന്നു പരിചയപ്പെടുത്തിയ ജി എം റാവുവും കന്യാസ്ത്രീയെന്നു പറയുന്ന സോഫിയയും ഫോണിൽ ബന്ധപ്പെട്ട് ഭാര്യ മരിച്ചുവെന്ന് അറിയിച്ചു. സംസ്കാരച്ചടങ്ങിന്റെ ദൃശ്യങ്ങളും അയച്ചുകൊടുത്തു. ശ്രദ്ധയുടെ രണ്ടരക്കോടിയുടെ സ്വത്ത്​ വിൽക്കാൻ ജി എം റാവുവിനെ ചുമതലപ്പെടുത്തിയെന്നും പറഞ്ഞു. എന്നാൽ, ഭാര്യ അന്യായതടങ്കലിലാണെന്നും ജോസഫ് മുമ്പും പണംപറ്റിയിട്ടുണ്ടെന്നും ഹർജിയിൽ വ്യക്തമാക്കി.

പൊലീസിൽ പരാതി നൽകിയിട്ടും ഫലമുണ്ടാകാത്തതിനാലാണ് കോടതിയെ സമീപിച്ചത്. നേരത്തേ ഹർജി പരിഗണിച്ചപ്പോൾ പ്രത്യേക അന്വേഷകസംഘത്തെ നിയോഗിക്കുന്നതിനെക്കുറിച്ച് കോടതി ആരാഞ്ഞിരുന്നു. നിലവിലുള്ള സംഘത്തിനുതന്നെ അന്വേഷണത്തിന് അവസരം നൽകണമെന്നായിരുന്നു സർക്കാരിന്റെ മറുപടി. ഹർജി തിങ്കളാഴ്ച വീണ്ടും പരിഗണിക്കും.