കൊയിലാണ്ടിയിൽ സ്ത്രീ വെട്ടേറ്റ് കൊല്ലപ്പെട്ടു; ഭർത്താവ് ഒളിവില്‍

കോഴിക്കോട് : കോഴിക്കോട് കൊയിലാണ്ടിയിൽ സ്ത്രീ വെട്ടേറ്റ് കൊല്ലപ്പെട്ടു. പൊയിൽക്കാവ് പാറയ്ക്കൽ സ്വദേശി സുധയെയാണ് കൊല്ലപ്പെട്ട നിലയിൽ കണ്ടെത്തിയത്.

കഴുത്തിനേറ്റ മുറിവാണ് മരണകാരണമെന്നാണ് പ്രാഥമിക നി​ഗമനം. സുധയുടെ ഭർത്താവ് കൃഷ്ണൻകുട്ടി ഒളിവിലാണ്. ഭാര്യയെ വെട്ടിക്കൊലപ്പെടുത്തിയ ശേഷം പ്രതി ഒളിവിൽ പോയതാകാമെന്നാണ് പൊലീസ് സംശയിക്കുന്നത്. വീടിന്റെ നിർമാണം നടക്കുന്നതിനാൽ താൽക്കാലികമായി നിർമിച്ച ഷെഡിലാണ് മൃതദേഹം കണ്ടെത്തിയത്. തൊഴിലുറപ്പ് പദ്ധതിയുടെ ഭാ​ഗമായി ഫോട്ടോയെടുക്കാനെത്തിയപ്പോഴാണ് വിവരമറിയുന്നത്. സുധയെ വീട്ടിൽ കാണാതിരുന്നതിനെ തുടർന്ന് പല തവണ ഫോണിൽ വിളിക്കുകയായിരുന്നു.

തുടർച്ചയായി വിളിച്ചിട്ടും ഫോൺ എടുക്കാതിരുന്നതിനെ തുടർന്ന് മകൾ വന്ന് വാതിൽതുറന്നപ്പോഴാണ് വെട്ടേറ്റ് കിടക്കുന്ന സുധയെ കണ്ടത്. മരംവെട്ട് തൊഴിലാളിയായ കൃഷ്ണൻകുട്ടിക്കായി തെരച്ചിൽ ഊർജിതമാക്കിയിട്ടുണ്ട്.