മുക്കം സബ് രജിസ്ട്രാർ ഓഫീസിൽ വിജിലൻസിന്റെ മിന്നൽ പരിശോധന; കണക്കിൽപ്പെടാത്ത പണം പിടിച്ചെടുത്തു

കോഴിക്കോട് : മുക്കം സബ് രജിസ്ട്രാർ ഓഫീസിൽ വിജിലൻസിന്റെ മിന്നൽ പരിശോധന. കണക്കിൽപ്പെടാത്ത പണം പിടിച്ചെടുത്തു. മുക്കം സബ് രജിസ്ട്രാർ ഓഫീസിലെ ഉദ്യോഗസ്ഥർ ഭൂമി രജിസ്ട്രേഷൻ നടപടികൾക്കായി എത്തുന്ന വ്യക്തികളിൽ നിന്നും ആധാരം എഴുത്തുകാർ മുഖേന കൈക്കൂലി വാങ്ങുന്നതായി വിജിലൻസിന് വിവരം ലഭിച്ചിരുന്നു. ലഭിക്കുന്ന കൈക്കൂലിപ്പണം വൈകീട്ട് ആധാരം എഴുത്തുകാർ ഓഫീസിലെത്തിച്ച് ഉദ്യോഗസ്ഥർക്ക് നൽകുന്നതായും വിവരം ലഭിച്ചിരുന്നു .

വിവരത്തിന്റെ അടിസ്ഥാനത്തിൽ വിജിലൻസ് കോഴിക്കോട് മുക്കം സബ് രജിസ്ട്രാർ ഓഫീസിൽ ഒരു മിന്നൽ പരിശോധന നടത്തി. വൈകീട്ട് നാലുമണിക്ക് ആരംഭിച്ച മിന്നൽ പരിശോധന ആറുമണിക്ക് അവസാനിച്ചു. മിന്നൽ പരിശോധനയിൽ ഡ്യൂട്ടിയിൽ ഉണ്ടായിരുന്ന ക്ലര്‍ക്കിന്റെ കയ്യിൽ നിന്നും കണക്കിൽപ്പെടാത്ത 1535/- രൂപ വിജിലൻസ് പിടിച്ചെടുത്തു.

പൊതുജനങ്ങളുടെ ശ്രദ്ധയിൽ അഴിമതി സംബന്ധിച്ച വിവരങ്ങൾ ലഭിക്കുകയാണെങ്കിൽ വിജിലൻസിന്റെടോൾ ഫ്രീ നമ്പരായ 1064 എന്ന നമ്പരിലോ 8592900900 എന്ന നമ്പരിലോ വാട്ട്സ്ആപ്പ് നമ്പരായ 9447789100 എന്ന നമ്പറിലോ അറിയിക്കണമെന്ന് വിജിലൻസ് ഡയറക്ടർ മനോജ് എബ്രഹാം ഐപിഎസ് അറിയിച്ചു.