കേമത്തരമല്ല, അൽപ്പത്തരമാണ്; ​ഗണ​ഗീതത്തെ ദേശീയ​ഗാനമാക്കാനാണ് ബിജെപി ശ്രമം: വി കെ സനോജ്

തിരുവനന്തപുരം: വന്ദേഭാരത് എക്സ്പ്രസിന്റെ ഉദ്ഘാടനയാത്രയിൽ വിദ്യാർഥികളക്കൊണ്ട് ആർഎസ്എസിന്റെ ​ഗണ​ഗീതം പാടിച്ചത് നിഷ്കളങ്കമായ കാര്യമല്ലെന്ന് ഡിവൈഎഫ്ഐ സംസ്ഥാവ സെക്രട്ടറി വി കെ സനോജ് പറഞ്ഞു. രാജ്യം ഔദ്യോ​ഗികമായി അം​ഗീകരിച്ച ദേശഭക്ത​ഗാനങ്ങളുണ്ട്. അതിനെയെല്ലാം നിരാകരിച്ചുകൊണ്ടാണ് ആർഎസ്എസിന്റെ ​ഗണ​ഗീതം ആലപിച്ചത്. ഇത് ചെറിയ സൂചനയല്ല, ദേശീയ​ഗാനത്തിന് പകരമായി ​ഗണ​ഗീതം കൊണ്ടുവരാനുള്ള നീക്കമാണെന്നും സനോജ് പറഞ്ഞു.

ദേശഭക്തിയെക്കുറിച്ച് പറയാൻ ബിജെപിക്ക് യോ​ഗ്യതയില്ല. ദേശീയ സ്വാതന്ത്ര്യസമരത്തിൽ പങ്കെടുക്കുന്നത് തന്നെ സമയം കളയാനാണെന്നാണ് ഇവരുടെ പൂർവികർ പറഞ്ഞിട്ടുള്ളത്. ആർഎസ്എസിന്റെ വർ​ഗീയ അജണ്ടയെ ശക്തമായി പ്രതിരോധിച്ചുകൊണ്ടാണ് ദേശീയപ്രസ്ഥാനത്തിന്റെ നേതൃനിര ആധുനിക ഇന്ത്യ കെട്ടിപ്പടുത്തത്. ദേശീയപ്രസ്ഥാന ചരിത്രത്തിന്റെ ഒരുവരിയിൽപോലും ഹിന്ദുത്വസംഘടനകളുടെ പങ്കില്ല.

അധികാരം ഉപയോ​ഗപ്പെടുത്തി കുട്ടികളെ തെറ്റായവഴിലൂടെ കൊണ്ടുപോകുന്നത് കേമത്തരമായി അവതരിപ്പിക്കുകയാണ് കേന്ദ്രമന്ത്രി സുരേഷ്​ഗോപി. ഇത് കേമത്തരമല്ല, അൽപ്പത്തരമാണ്. സംഭവത്തിൽ കുട്ടികൾ നിരപരാധികളാണ്. അവരെക്കൊണ്ട് ​ഗണ​ഗീതം ചൊല്ലിച്ചതാണ്. വിദ്യാഭ്യാസവകുപ്പ് പ്രഖ്യാപിച്ച അന്വേഷണത്തിന്മേൽ കൂടുതൽ വിവരങ്ങൾ പുറത്തുവരുമെന്നും സനോജ് പറഞ്ഞു.

ആർഎസ്എസ് ശാഖയിൽ ഉപയോ​ഗിക്കുന്ന ​ഗണ​ഗീതത്തെ ദേശഭക്തി​ഗാനമായി അം​ഗീകരിക്കാനാകില്ല. രാജ്യത്തിന്റെ നികുതിപ്പണം ഉപയോ​ഗിച്ച് നടത്തുന്ന പൊതുചടങ്ങുകളിൽ ആർഎസ്എസിന്റെ ​ഗണ​ഗീതം പാടാൻ അനുവദിക്കില്ല. ഭരണഘടനാ സ്ഥാപനങ്ങളെ അട്ടിമറിക്കാനുള്ള ശ്രമങ്ങളെ എന്ത് വിലകൊടുത്തും ചെറുക്കുമെന്നും സനോജ് മാധ്യമങ്ങളോട് പറഞ്ഞു.