അസുഖം ഭേദമായിട്ടും ഏറ്റെടുക്കാൻ ആരും എത്തിയില്ല; 25 പേരെ ഗാന്ധിഭവനിലേക്ക് മാറ്റി

തിരുവനന്തപുരം: തിരുവനന്തപുരം മെഡിക്കൽ കോളേജ് ആശുപത്രിയിൽ നിന്ന് ഡിസ്ചാർജായ ശേഷവും ബന്ധുക്കൾ ഏറ്റെടുക്കാനില്ലാതെ കഴിഞ്ഞിരുന്നവരെ പത്തനാപുരം ഗാന്ധിഭവൻ ഇന്റർനാഷണൽ ട്രസ്റ്റിലേയ്ക്ക് പുനരധിവസിപ്പിച്ചു. സാമൂഹ്യനീതി വകുപ്പിന്റെ വയോരക്ഷാ പദ്ധതിയിൽ ഉൾപ്പെടുത്തിയാണ് 21 പുരുഷന്മാരും 4 സ്ത്രീകളുമുൾപ്പെടെ 25 പേരെ പത്തനാപുരം ഗാന്ധിഭവൻ സംരക്ഷണ കേന്ദ്രത്തിലേക്ക് മാറ്റിയത്. ബന്ധുക്കളെക്കുറിച്ച് വിവരങ്ങൾ ലഭ്യമല്ലാത്തവരും ഇതരസംസ്ഥാനക്കാരും സ്വന്തം പേരുപോലും ഓർമയില്ലാത്തവരും ഇതിൽ ഉൾപെടും.

അസുഖങ്ങൾ ഭേദമായ ശേഷവും വീട്ടിലേക്ക് മടങ്ങിപ്പോകാനാവാത്തവരുടെ പ്രയാസം പരി​ഗണിച്ചാണ് സമ്പൂർണമായ പുനരധിവാസം ഏറ്റെടുക്കണമെന്ന് സാമൂഹ്യനീതി വകുപ്പ് തീരുമാനമെടുത്തത്. കഴിഞ്ഞ വർഷങ്ങളിൽ ഒട്ടേറെ വയോജനങ്ങളെയും രോഗങ്ങൾ ഭേദമായവരെയും ഓർഫനേജ് കൺട്രോൾ ബോർഡിന് (ഒസിബി) കീഴിലുള്ള വിവിധ സ്ഥാപനങ്ങൾ ഏറ്റെടുത്തിരുന്നു. ഏറ്റവുമധികം ആളുകളെ ഏറ്റെടുത്തത് പത്തനാപുരത്തെ ഗാന്ധിഭവനാണ്.