കണ്ണൂർ പയ്യാമ്പലം ബീച്ചിൽ രണ്ടുപേർ തിരയിൽപ്പെട്ടു; ഒരാളെ കാണാതായി

കണ്ണൂര്‍: കണ്ണൂര്‍ പയ്യാമ്പലത്ത് രണ്ടുപേര്‍ തിരയില്‍പ്പെട്ടു. കൊട്ടിയൂർ തീർഥാടനത്തിനെത്തിയ കർണാടക സ്വദേശികളാണ് ബീച്ചിൽ അപകടത്തിൽപ്പെട്ടത്. ഒരാളെ രക്ഷപ്പെടുത്തി. മറ്റൊരാളെ കാണാതായി.

ഇന്ന് രാവിലെ 12.30ഓടെയായിരുന്നു അപകടം. ബം​ഗളൂരു സ്വദേശി സന്തോഷി(20)നെയാണ് കാണാതായത്. ഇയാളെ കണ്ടെത്താനുള്ള തിരച്ചിൽ തുടരുകയാണ്. രണ്ടര മണിക്കൂർ പിന്നിട്ടിട്ടും കണ്ടെത്താനായിട്ടില്ല. അപായ സൂചന അവ​ഗണിച്ച് കർണാടക സ്വദേശികൾ കടലിൽ ഇറങ്ങിയതാണെന്നാണ് സൂചന.

ലൈഫ് ​ഗാർഡ്മാരും ഏതാനും മത്സ്യത്തൊഴിലാളികളും മാത്രമാണ് തിരച്ചിൽ നടത്തിയിരുന്നത്. സന്തോഷിന് ഒപ്പമുണ്ടായിരുന്ന മറ്റൊരു കർണാടക സ്വദേശിയെ ലൈഫ്​ഗാർഡ് രക്ഷപ്പെടുത്തിയിരുന്നു. രക്ഷാപ്രവർത്തനത്തിന് കൂടുതൽ സംവിധാനങ്ങളെത്തിക്കുമെന്ന് ഉദ്യോ​ഗസ്ഥർ അറിയിച്ചു. ‌