ട്രാഫിക് അലർട്ട്: കോട്ടയത്ത് നാളെ മുതൽ ഗതാഗത നിയന്ത്രണം

കോട്ടയം: കോട്ടയം നഗരത്തിലെ കോടിമത പാലത്തിന്റെ അപ്രോച്ച് റോഡ് നവീകരണത്തിനായി അടയ്ക്കുന്നു. നാളെ (ജൂലൈ 2) രാവിലെ 10:00 മണി മുതൽ നഗരത്തിൽ കടുത്ത ഗതാഗത നിയന്ത്രണങ്ങൾ ഏർപ്പെടുത്താൻ ജില്ലാ കളക്ടർ ഉത്തരവിട്ടു. പാലത്തിലൂടെയുള്ള ഗതാഗതം പൂർണ്ണമായി നിരോധിച്ചതിനാൽ, നഗരത്തിലേക്കുള്ള പ്രവേശന കവാടങ്ങളിൽ നിന്നുതന്നെ വാഹനങ്ങൾ തിരിച്ചുവിടും. നിയന്ത്രണങ്ങൾ ഒരാഴ്ച നീളുമെന്നതിനാൽ യാത്രക്കാർ സമയം മുൻകൂട്ടി കണ്ട് ഇറങ്ങണമെന്ന് കളക്ടർ അറിയിച്ചു.

തിരുവനന്തപുരം ഭാഗത്തുനിന്ന് എറണാകുളത്തേക്ക് പോകേണ്ട ചരക്ക്-സ്വകാര്യ വാഹനങ്ങൾ ളായിക്കാട് ബൈപ്പാസ് ജംഗ്ഷനിൽ നിന്ന് തിരിഞ്ഞ് തെങ്ങണ, പുതുപ്പള്ളി, മണർകാട് ബൈപ്പാസ് വഴി ഏറ്റുമാനൂർ പട്ടിത്താനത്ത് പ്രവേശിക്കണം. എറണാകുളത്തുനിന്ന് തിരികെ പോകുന്ന വാഹനങ്ങൾ പട്ടിത്താനം ജംഗ്ഷനിൽ നിന്ന് മണർകാട്, പുതുപ്പള്ളി വഴി തെങ്ങണയിലെത്തി യാത്ര തുടരണം. അന്തർ സംസ്ഥാന ബസുകൾ കോട്ടയം ടൗണിൽ പ്രവേശിക്കാതെ മണർകാട്, ഏറ്റുമാനൂർ വഴി സർവീസ് നടത്തണം.

ചങ്ങനാശ്ശേരിയിൽ നിന്ന് ടൗൺ, മെഡിക്കൽ കോളേജ്, ഏറ്റുമാനൂർ ഭാഗങ്ങളിലേക്ക് പോകേണ്ട കെഎസ്ആർടിസി, സ്വകാര്യ ബസുകൾ സിമന്റ് കവലയിൽ നിന്ന് തിരിഞ്ഞ് പാറേച്ചാൽ ബൈപ്പാസ്, തിരുവാതുക്കൽ, അറുത്തൂട്ടി വഴി ചാലുകുന്ന് ജംഗ്ഷനിലെത്തണം. ടൗണിൽ നിന്ന് ചങ്ങനാശ്ശേരി ഭാഗത്തേക്ക് പോകേണ്ട ബസുകൾ കഞ്ഞിക്കുഴിയിൽ എത്തി കൊല്ലാട്, കടുവാക്കുളം വഴി പോകണം. പുതുപ്പള്ളി, മണർകാട് ഭാഗങ്ങളിലേക്ക് പോകേണ്ട മറ്റ് സ്വകാര്യ വാഹനങ്ങൾ മണിപ്പുഴ ജംഗ്ഷനിൽ നിന്ന് തിരിഞ്ഞ് കടുവാക്കുളം, കൊല്ലാട് വഴി തിരിഞ്ഞുപോകണം.

ചങ്ങനാശ്ശേരി ഭാഗത്തുനിന്ന് ജില്ലാ ആശുപത്രിയിലേക്കും മെഡിക്കൽ കോളേജിലേക്കും രോഗികളുമായി പോകുന്ന ആംബുലൻസുകളും മറ്റ് എമർജൻസി വാഹനങ്ങളും മണിപ്പുഴ ജംഗ്ഷനിൽ നിന്ന് വലത്തോട്ട് തിരിഞ്ഞ് ഈരയിൽ കടവ് ബൈപ്പാസ് വഴി മനോരമ ജംഗ്ഷനിലെത്തി വേണം കടന്നുപോകാൻ.