തിരുവനന്തപുരം മെഡിക്കൽ കോളേജ്‌ ആശുപത്രി ; 180 കോടിയുടെ വികസനപദ്ധതികൾക്ക്‌ സാക്ഷാൽക്കാരം

തിരുവനന്തപുരം

തിരുവനന്തപുരം മെഡിക്കൽ കോളേജ്‌ ആശുപത്രിയിൽ നടപ്പാക്കിയ, 180 കോടിയിലധികം രൂപയുടെ 15 പദ്ധതികൾ മുഖ്യമന്ത്രി പിണറായി വിജയൻ ഉദ്‌ഘാടനം ചെയ്‌തു. സമഗ്ര വികസനത്തിന്‌ സാക്ഷ്യംവഹിച്ച തിരുവനന്തപുരം മെഡിക്കൽ കോളേജ്‌ ആശുപത്രി സംസ്ഥാന ആരോഗ്യമേഖലയുടെ അഭിമാനസ്തംഭമാണെന്ന്‌ മുഖ്യമന്ത്രി പറഞ്ഞു.

ജനങ്ങളെ മുന്നില്‍ക്കണ്ടുള്ള വലിയ മാറ്റങ്ങളാണ്‌ കേരളത്തിൽ നടപ്പാക്കുന്നത്‌. നേട്ടങ്ങളിൽ ഉറച്ചുനിന്ന്‌ കൂടുതൽ വികസനം സാധ്യമാക്കുമെന്നും മുഖ്യമന്ത്രി പറഞ്ഞു. തിരുവനന്തപുരം മെഡിക്കൽ കോളേജ്‌ ആശുപത്രിയെ കൂടുതല്‍ ശാക്തീകരിക്കാനാണ് ശ്രമിക്കുന്നത്. ഒമ്പതുവര്‍ഷംകൊണ്ട് 2070 കോടി രൂപ ചെലവഴിച്ചു. അതിലൂടെ ഭൗതിക സാഹചര്യവും രോഗീപരിചരണവും മെച്ചപ്പെടുത്തി. കിഫ്ബി ഫണ്ട് ഉപയോഗിച്ചാണ് വിവിധ വികസന പദ്ധതികള്‍ നടപ്പാക്കിയത്.

2016നുമുമ്പ് നാടിന്റെ അഭിമാന സ്തംഭങ്ങളായ മേഖലകള്‍ വലിയ തകര്‍ച്ച നേരിട്ടു. ബജറ്റിലൂടെമാത്രം ഇത് പരിഹരിക്കാനാകില്ലെന്ന് കണ്ട് ഈ സര്‍ക്കാര്‍ കിഫ്ബിവഴി തുക കണ്ടെത്തി. അഞ്ച്‌ വര്‍ഷംകൊണ്ട് 62,000 കോടി രൂപയുടെ വികസനം നടപ്പാക്കി. ഇപ്പോള്‍ അത് 90,000 കോടി രൂപയായി ഉയര്‍ത്താനായി. ആരോഗ്യ മേഖലയില്‍മാത്രം കിഫ്ബിയിലൂടെ നടന്നത് 10,000 കോടിയിലധികം രൂപയുടെ വികസനമാണ്. സ്വകാര്യ മേഖലയിൽ ചികിത്സാ ചെലവ്‌ ഏറുന്ന പ്രവണതയുണ്ട്‌. ഇത്‌ കേരളത്തിന്റെ ആരോഗ്യരംഗത്തെ പുതിയ പ്രശ്‌നമാണ്. അവിടെയാണ് ഗവ. മെഡിക്കല്‍ കോളേജുകളുടെ പ്രസക്തിയെന്നും മുഖ്യമന്ത്രി പറഞ്ഞു.​