സാങ്കേതിക സര്‍വകലാശാല: ഭരണപ്രതിസന്ധി സൃഷ്ടിക്കാന്‍ വിസി

തിരുവനന്തപുരം: എ പി ജെ അബ്ദുൾകലാം സാങ്കേതിക സർവകലാശാലയിൽ വിവേചനാധികാരം ഉപയോ​ഗിക്കാനുള്ള വൈസ്‌ ചാൻസലറുടെ നീക്കം ഭരണപ്രതിസന്ധിക്ക്‌ വഴിയൊരുക്കുന്നു. സിൻഡിക്കറ്റ് യോ​ഗം ചേർന്ന് ബജറ്റ് പാസാക്കാൻ കഴിയില്ലെന്നത്‌ ചൂണ്ടിക്കാട്ടിയാണ് താൽക്കാലിക വി സി ഡോ. കെ ശിവപ്രസാദ്‌ അധികാര പ്രയോഗത്തിന്‌ ശ്രമിക്കുകയാണ്‌. എന്നാൽ, ഇതുസംബന്ധിച്ച വിവരം വി സി ഇതുവരെയും ചാൻസലറെ രേഖാമൂലം അറിയിച്ചിട്ടില്ല. രണ്ട് സിൻഡിക്കറ്റ്‌ യോ​ഗങ്ങളുടെ ഇടയിലുണ്ടാകുന്ന അടിയന്തര സാഹചര്യങ്ങളിൽ മാത്രമാണ് വിസിക്ക് വിവേചനാധികാരം ഉപയോ​ഗിക്കാൻ കഴിയുക.

പരീക്ഷാഫല പ്രഖ്യാപനം പോലെ സിൻഡിക്കറ്റ്, ബോർഡ് ഓഫ് ​ഗവർണേഴ്സ് എന്നിവ തീരുമാനിക്കേണ്ട വിഷയങ്ങളിൽ യോ​ഗം ചേരാതെ വിസിക്ക് നേരിട്ട് തീരുമാനമെടുക്കാം. എന്നാൽ പിന്നീട് ചേരുന്ന സിൻഡിക്കറ്റ് യോ​ഗം ഇത്‌ അം​ഗീകരിക്കണം. അം​ഗീകരിച്ചില്ലെങ്കിൽ വിസിക്ക് വിഷയം ചാൻസലറായ ഗവർണർക്ക് അയയ്‌ക്കാം. ഇത്തരത്തിൽ വിവേചനാധികാരം ഉപയോ​ഗിച്ച രണ്ടു വിഷയത്തിലെ ചാൻസലറുടെ തീരുമാനം ഹൈക്കോടതി റദ്ദാക്കിയിരുന്നു.