കുറ്റിപ്പുറത്ത് എംഡിഎംഎയുമായി തവനൂർ സ്വദേശികൾ പിടിയിൽ

തിരൂർ: കുറ്റിപ്പുറത്ത് എംഡിഎംഎയുമായി തവനൂർ സ്വദേശികൾ പിടിയിൽ. തവനൂർ തെക്കുമുറി കരുമത്ത് പറമ്പിൽ മുഹമ്മദ് റിസ്വാൻ (25), തവനൂർ അങ്ങാടിക്കുസമീപം താമസിക്കുന്ന മുഹമ്മദ് ജാസിർ (42) എന്നിവരാണ് പൊലീസിന്റെ പിടിയിലായത്. വിൽപ്പനയ്ക്കായി ബം​ഗളൂരുവിൽ നിന്നുമെത്തിച്ച വിപണിയിൽ അഞ്ചുലക്ഷം വിലവരുന്ന 100 ​ഗ്രാമോളം എംഡിഎംഎ ഇവരിൽ നിന്നും പിടിച്ചെടുത്തു. തവനൂർ കേന്ദ്രീകരിച്ച് ലഹരി വിൽപ്പന നടത്തുന്നതായ രഹസ്യവിവരത്തിന്റെ അടിസ്ഥാനത്തിൽ നടത്തിയ പരിശോധനയിലാണ് ഇരുവരും പിടിയിലായത്.

നിരവധി വിദ്യാഭ്യാസസ്ഥാപനങ്ങൾ പ്രവർത്തിക്കുന്ന തവനൂരിലും പരിസരങ്ങളിലും വിൽപ്പന നടത്താനായാണ് എംഡിഎംഎ ബം​ഗളൂരുവിൽ നിന്നും എത്തിച്ചതെന്ന് പ്രതികൾ മൊഴി നൽകി. ഇവരിൽ നിന്ന് പ്രദേശത്ത് ലഹരി വിൽപ്പന നടത്തുന്നവരെക്കുറിച്ചും ഇടനിലക്കാരെക്കുറിച്ചും ഉപയോഗിക്കുന്നവരെക്കുറിച്ചും കൂടുതൽ വിവരങ്ങൾ ലഭിച്ചതായും മേഖലയിൽ ലഹരി ഉപയോഗിക്കുന്നവരെ നിരീക്ഷിച്ചുവരികയാണെന്ന് പൊലീസ് പറഞ്ഞു. വരും ദിവസങ്ങളിലും കൂടുതൽ അറസ്റ്റുണ്ടായേക്കും.