കേരള നിയമസഭയെ 
അവഹേളിച്ച് 
സുരേഷ് ​ഗോപി

ന്യൂഡൽഹി : വഖഫ്‌ ബില്ലിന്‌ എതിരെ ഏകകണ്ഠമായി പ്രമേയം പാസാക്കിയ കേരള നിയമസഭയെ അവഹേളിച്ച് കേന്ദ്രസഹമന്ത്രി സുരേഷ് ​ഗോപി. "കേരളാനിയമസഭയിൽ വഖഫ്‌ ബില്ലിന്‌ എതിരെ ഇക്കൂട്ടർ അനാവശ്യമായി പ്രമേയം കൊണ്ടുവന്നു. ബിൽ പാർലമെന്റ്‌ പാസാക്കുന്നതോടെ ആ പ്രമേയത്തിന്റെ സ്ഥാനം അറബിക്കടലിൽ ആയിരിക്കും'. പാർലമെന്ററി മര്യാദകളെ കാറ്റിൽപ്പറത്തി സഭാം​ഗങ്ങളുടെ നേര്‍ക്ക് കൈചൂണ്ടി സുരേഷ്‌ ഗോപി പറഞ്ഞു.

വഖഫ്‌ ഭേദഗതി ബില്ലിനുപിന്നിലെ കേന്ദ്രസര്‍ക്കാരിന്റെ ന്യൂനപക്ഷവിരുദ്ധത തുറന്നുകാട്ടിയ സിപിഐ എം ലോക്‌സഭാ നേതാവ്‌ കെ രാധാകൃഷ്‌ണന്റെ പ്രസംഗമാണ് സുരേഷ് ​ഗോപിയെ ചൊടിപ്പിച്ചത്. പ്രസം​ഗത്തിൽ തന്റെ പേര്‌ അനാവശ്യമായി പരാമർശിച്ചെന്ന്‌ ആരോപിച്ച സുരേഷ്‌ഗോപി രോഷാകുലനായി. അം​ഗങ്ങളോടുള്ള പരസ്പരബഹുമാനംപോലും മറന്ന് രാധാകൃഷ്ണനെതിരെ കൈ ചൂണ്ടിയായിരുന്നു ആക്രോശം.

നിയമസഭ പാസാക്കിയ പ്രമേയത്തെ അധിക്ഷേപിക്കുന്നതരത്തിൽ സംസാരിക്കുന്നത് പാര്‍ലമെന്ററി മര്യാദയല്ലെന്നും എംപിക്ക് യോജിക്കുന്ന പെരുമാറ്റമല്ല സുരേഷ്​ഗോപിയുടേതെന്നും വിമര്‍ശം ശക്തമായി.