കോഴിക്കോട് മെഡിക്കൽ കോളേജ് കെട്ടിടത്തിൽ പുക; ആളപായമില്ല

കോഴിക്കോട്: കോഴിക്കോട് മെഡിക്കൽ കോളേജ് ആശുപത്രി കെട്ടിടത്തിൽ പുക ഉയർന്നു. മെഡിക്കൽ കോളേജ് അത്യാഹിത വിഭാഗം കെട്ടിടത്തിലെ ആറാം നിലയിലാണ് പുക ഉയർന്നത്. അ​ഗ്നിരക്ഷാ സേനയെത്തി നടപടികൾ സ്വീകരിച്ചു. സംഭവത്തെ തുടർന്ന് കെട്ടിടത്തിൽ നിന്ന് ആളുകളെ ഒഴിപ്പിച്ചു. ആളപായമോ നാശ നഷ്ടമോ റിപ്പോർട്ട് ചെയ്തിട്ടില്ല.

ആറാം നിലയിൽ വിവിധ വിഭാ​ഗങ്ങളിലെ ഓപറേഷൻ തീയറ്ററുകൾ മാത്രമാണ് പ്രവർത്തിച്ചിരുന്നത്. ഇതിൽ 15ാം നമ്പർ മുറിയിലാണ് പുക ഉയർന്നത്. ഈ സമയം ആറാം നിലയിൽ രോ​ഗികളൊന്നും ഉണ്ടായിരുന്നില്ല. ഏതാനും ജീവനക്കാർ മാത്രമാണ് സ്ഥലത്തുണ്ടായിരുന്നത്. ശബ്ദവും പുകയും ശ്രദ്ധയിൽപ്പെട്ടതോടെ ഇവർ സുരക്ഷിത സ്ഥലങ്ങളിലേക്ക് മാറി. മൂന്നാം നിലയിലുണ്ടായിരുന്ന രോ​ഗികളെയും ഒഴിപ്പിച്ചിട്ടുണ്ട്.