കേരളം ഞെട്ടി; കഷായവും ജ്യൂസും ചർച്ചയായി; ഷാരോൺ വധക്കേസ് നാൾവഴികൾ

തിരുവനന്തപുരം: കാമുകനെ ജിവിതത്തിൽ നിന്ന് ഒഴിവാക്കുന്നതിനും കുടുംബം ഉറപ്പിച്ച വിവാഹത്തിനുമായി ​ഗ്രീഷ്മ എന്ന 22 കാരി നടത്തിയ കൊലപാതകം കേരള മനസാക്ഷിയെ നടുക്കുന്നതായിരുന്നു. ​മരണമൊഴിയിൽ പോലും ഗ്രീഷ്മക്കെതിരായ ഒരു ആരോപണവും കൊല്ലപ്പെട്ട ഷാരോൺ ഉന്നയിച്ചിരുന്നില്ല. എന്നാൽ മകന്റെ മരണത്തിൽ വിശദമായ അന്വേഷണം ആരംഭിച്ച് കുടുംബം നൽകിയ പരാതിയിൽ പൊലീസ് നടത്തിയ അന്വേഷണത്തിൽ ​ഗ്രീഷ്മ കുടുങ്ങി.
ഗ്രീഷ്മ ഇതിന് മുന്‍പും കാമുകനെ കൊലപ്പെടുത്താന്‍ ശ്രമിച്ചിട്ടുണ്ടെന്നതടക്കമുള്ള വിവരങ്ങൾ ഇതോടെ പുറത്തുവന്നു. പാരസെറ്റമോള്‍ ഗുളികകള്‍ പൊടിച്ച് ജ്യൂസില്‍ കലര്‍ത്തി നല്‍കിയാണ് ആദ്യം കൊലപാതകശ്രമം നടത്തിയത്. എന്നാൽ ജ്യൂസിന് കയ്പ്പാണെന്ന് പറഞ്ഞ് ഷാരോണ്‍ തുപ്പിക്കളഞ്ഞതോടെയാണ് പദ്ധതി പരാജയപ്പെട്ടു. പിന്നീട് വീട്ടിൽ വിളിച്ചുവരുത്തി കഷായത്തില്‍ വിഷം കലര്‍ത്തി നല്‍കി ദൗത്യം നടപ്പാക്കി. പഴുതടച്ച അന്വേഷണത്തിനും വിചാരണക്കുമൊടുവിൽ ​ഗ്രീഷ്മ കുറ്റക്കാരിയെന്ന് ഇന്ന് കോടതി കണ്ടെത്തി. നാളെ ശിക്ഷാവിധിയും ഉണ്ടാകും.
ഷാരോൺ വധക്കേസ് നാൾവഴികൾ
● 2022 ഒക്ടോബർ 14

ഗ്രീഷ്മ നൽകിയ കഷായം കുടിച്ചശേഷം ഛർദ്ദിച്ച് അവശ നിലയിലായ ഷാരോണിനെ പാറശാല താലൂക്ക് ആശുപത്രിയിൽ പ്രവേശിപ്പിക്കുന്നു. പിന്നീട് ഇവിടെ നിന്ന് തിരുവനന്തപുരം മെഡിക്കൽ കോളേജിലേക്ക് മാറ്റി.
● 2022 ഒക്ടോബർ 17

ആരോ​ഗ്യ നില വഷളായ ഷാരോണിന്റെ ആന്തരികാവയവങ്ങൾ തകരാറിലാകുന്നു. വായ്ക്കുള്ളിൽ വ്രണങ്ങൾ ഉണ്ടായി. വൃക്കകളുടെ പ്രവർത്തനം നിലച്ചതോടെ ഡയാലിസിസ് ട്രീറ്റ്മെന്റ് ആരംഭിച്ചു.
● 2022 ഒക്ടോബർ 20

മെഡിക്കൽ കോളേജിൽ നിന്ന് ആവശ്യപ്പെട്ടതനുസരിച്ച് പാറശാല പൊലീസ് മജിസ്ട്രേറ്റിനെ ആശുപത്രിയിലെത്തിച്ച് ഷാരോണിന്റെ മൊഴി രേഖപ്പെടുത്തി. ഗ്രീഷ്മ നൽകിയ കഷായം കുടിച്ചിരുന്നതായും എന്നാൽ ഗ്രീഷ്മ തന്നെ അപായപ്പെടുത്തുമെന്ന് കരുതുന്നില്ലെന്നും മജിസ്‌ട്രേറ്റിന് മുന്നിൽ ഷാരോൺ മരണമൊഴി നൽകി.
● 2022 ഒക്ടോബർ 21

പൊലീസ് ഷാരോണിൻറെ മൊഴിയെടുത്തു.
● 2022 ഒക്ടോബർ 24

ഗുരുതരാവസ്ഥയിലായ ഷാരോണിനെ വെൻറിലേറ്ററിലേക്ക് മാറ്റി.
● 2022 ഒക്ടോബർ 25

വൈകീട്ട് 5.45-ന് ഷാരോൺ മരിച്ചു.
● 2022 ഒക്ടോബർ 27

അന്വേഷണം ആവശ്യപ്പെട്ട് ഷാരോണിൻറെ പിതാവ് പാറശാല പൊലീസിൽ പരാതി നൽകി.
● 2022 ഒക്ടോബർ 29

അന്വേഷണം ക്രൈംബ്രാഞ്ചിനു കൈമാറി.
● 2022 ഒക്ടോബർ 30

ഗ്രീഷ്മയെ പൊലീസ് വിളിച്ചു വരുത്തി ചോദ്യം ചെയ്തു. ഗ്രീഷ്മ കുറ്റം സമ്മതിച്ചു. ബന്ധുക്കളേയും പൊലീസ് ചോദ്യംചെയ്തു.
● 2022 ഒക്ടോബർ 31

ഗ്രീഷ്മയുടെ അറസ്റ്റ് രേഖപ്പെടുത്തി. പൊലീസ് സ്റ്റേഷനിലെ ശുചിമുറിയിൽ നിന്ന് അണുനാശിനി കുടിച്ച് ​ഗ്രീഷ്മ ആത്മഹത്യക്ക് ശ്രമിച്ചു. കേസിൽ ഗ്രീഷ്മയുടെ അമ്മ സിന്ധുവിനെയും അമ്മാവൻ നിർമൽകുമാറിനെയും പൊലീസ് കസ്റ്റഡിയിലെടുത്തു.
● 2022 നവംബർ 01

കീടനാശിനിയുടെ ബോട്ടിലും അതിലെ ലേബലും പ്രത്യേക അന്വേഷണസംഘം കണ്ടെടുത്തു.
● 2023 ജനുവരി 25

കേസിൽ പൊലീസ് കുറ്റപത്രം സമർപ്പിച്ചു.
● 2023 സെപ്റ്റംബർ 25

111 ദിവസത്തെ ജയിൽവാസത്തിനു ശേഷം ഹൈക്കോടതി ​ഗ്രീഷ്മക്ക് ജാമ്യം അനുവദിച്ചു.
● 2024 ഒക്ടോബർ 15

നെയ്യാറ്റിൻകര അഡീഷണൽ സെഷൻസ് കോടതിയിൽ വിചാരണ ആരംഭിച്ചു.
● 2025 ജനുവരി 03

ഒന്നാംപ്രതി ഗ്രീഷ്‌മയ്ക്കെതിരെയുള്ള കൊലപാതകക്കുറ്റവും ഗ്രീഷ്മയുടെ അമ്മ സിന്ധുവിനും അമ്മാവൻ നിർമലകുമാരൻ നായർക്കുമെതിരെ തെളിവുനശിപ്പിച്ച കുറ്റങ്ങളും തെളിഞ്ഞതായി സ്പെഷ്യൽ പബ്ലിക് പ്രോസിക്യൂട്ടർ വി എസ് വിനീത് കുമാർ വാദിച്ചു. കേസിൽ അന്തിമവാദം പൂർത്തിയായി, വിധി പറയാൻ മാറ്റി.
● 2025 ജനുവരി 17

ഗ്രീഷ്മയും അമ്മാവൻ നിർമലകുമാരൻ നായരും കുറ്റക്കാരെന്ന് നെയ്യാറ്റിൻകര കോടതി.