പാറശാല ഷാരോൺ വധക്കേസ്: ​ഗ്രീഷ്മയും അമ്മാവനും കുറ്റക്കാർ; ശിക്ഷാവിധി നാളെ

തിരുവനന്തപുരം: പാറശാല ഷാരോൺ വധക്കേസിൽ ഒന്നാംപ്രതി ഗ്രീഷ്‌മ കുറ്റക്കാരിയെന്ന് കോടതി. ​

​ഗ്രീഷ്മക്കെതിരെ കൊലപാതകം ഉൾപ്പെടെയുള്ള കുറ്റം തെളിഞ്ഞു. ഗ്രീഷ്മയുടെ അമ്മാവൻ നിർമലകുമാരൻ നായരും കുറ്റം ചെയ്തതായി കോടതി കണ്ടെത്തി. അമ്മ സിന്ധുവിനെ വെറുതെവിട്ടു. നെയ്യാറ്റിൻകര സെഷൻസ് കോടതിയാണ് കേസ് പരി​ഗണിച്ച് വിധി പറഞ്ഞത്. ശിക്ഷാവിധി നാളെ. നെയ്യാറ്റിൻകര അഡീഷണൽ സെഷൻസ് ജഡ്‌ജി എ എം ബഷീർ മുമ്പാകെ മൂന്നുദിവസം നടന്ന വാദപ്രതിവാദങ്ങൾക്കു ശേഷമാണ് കേസ്‌ ഇന്ന് വിധിപറയാൻ മാറ്റിയത്. ഒന്നാംപ്രതി ഗ്രീഷ്‌മയ്ക്കെതിരെയുള്ള കൊലപാതകക്കുറ്റവും ഗ്രീഷ്മയുടെ അമ്മ സിന്ധുവിനും അമ്മാവൻ നിർമലകുമാരൻ നായർക്കുമെതിരെ തെളിവുനശിപ്പിച്ച കുറ്റങ്ങളും തെളിഞ്ഞതായി സ്പെഷ്യൽ പബ്ലിക് പ്രോസിക്യൂട്ടർ വി എസ് വിനീത് കുമാർ വാദിച്ചിരുന്നു.
ഗ്രീഷ്മ ഷാരോൺ രാജിനെ 2022 ഒക്ടോബർ 14ന്‌ വീട്ടിലെത്തിച്ച്‌ കഷായത്തിൽ വിഷം കലർത്തി കൊലപ്പെടുത്തി എന്നാണ്‌ കേസ്‌. സംഭവത്തിന് 11 ദിവസത്തിനുശേഷം മെഡിക്കൽ കോളേജ് ഐസിയുവിൽവച്ചാണ്‌ ഷാരോൺ രാജ് മരിച്ചത്. ഷാരോണും ഗ്രീഷ്മയും വർഷങ്ങളായി പ്രണയത്തിലായിരുന്നു. മറ്റൊരു വ്യക്തിയുമായുള്ള വിവാഹം നടക്കുന്നതിനായി ​ഗ്രീഷ്മ ഷാരോണിനെ ഒഴിവാക്കാന്‍ ശ്രമിച്ചിരുന്നു. ഷാരോൺ പ്രണയ ബന്ധത്തില്‍നിന്നു പിന്മാറാത്തതാണു കൊലപാതകത്തിലേക്ക് നയിച്ചത്.
ഗ്രീഷ്മ നല്‍കിയ കഷായം കുടിച്ചിരുന്നതായും എന്നാല്‍ ഗ്രീഷ്മ തന്നെ അപായപ്പെടുത്തുമെന്ന് കരുതുന്നില്ലെന്നും മജിസ്‌ട്രേറ്റിന് മുന്നില്‍ മരണമൊഴി നല്‍കുന്നതിനിടെ ഷാരോണ്‍ പറഞ്ഞിരുന്നു. ഇതാണ് അന്വേഷണ സംഘത്തിന് നിർണായകമായത്. ഫോറന്‍സിക് ഡോക്ടര്‍ കൈമാറിയ ശാസ്ത്രീയ തെളിവുകളും നിര്‍ണായകമായി. പൊലീസ് വിളിച്ചു വരുത്തി ചോദ്യം ചെയ്തപ്പോള്‍ ഗ്രീഷ്മ കുറ്റം സമ്മതിച്ചു.
2023 ജനുവരി 25നാണ് കേസില്‍ പൊലീസ് കുറ്റപത്രം സമര്‍പ്പിച്ചത്. കഴിഞ്ഞ വര്‍ഷം ഒക്ടോബര്‍ 15ന് തുടങ്ങിയ വിചാരണ ഈ മാസം മൂന്നിനാണ് അവസാനിച്ചത്. 95 സാക്ഷികളെയാണ് കേസില്‍ വിസ്തരിച്ചത്.
ഷാരോൺ വധക്കേസ് നാൾവഴികൾ
ഷാരോൺ വധക്കേസ് നാൾവഴികൾ
● 2022 ഒക്ടോബർ 14

ഗ്രീഷ്മ നൽകിയ കഷായം കുടിച്ചശേഷം ഛർദ്ദിച്ച് അവശ നിലയിലായ ഷാരോണിനെ പാറശാല താലൂക്ക് ആശുപത്രിയിൽ പ്രവേശിപ്പിക്കുന്നു. പിന്നീട് ഇവിടെ നിന്ന് തിരുവനന്തപുരം മെഡിക്കൽ കോളേജിലേക്ക് മാറ്റി.
● 2022 ഒക്ടോബർ 17

ആരോ​ഗ്യ നില വഷളായ ഷാരോണിന്റെ ആന്തരികാവയവങ്ങൾ തകരാറിലാകുന്നു. വായ്ക്കുള്ളിൽ വ്രണങ്ങൾ ഉണ്ടായി. വൃക്കകളുടെ പ്രവർത്തനം നിലച്ചതോടെ ഡയാലിസിസ് ട്രീറ്റ്മെന്റ് ആരംഭിച്ചു.
● 2022 ഒക്ടോബർ 20

മെഡിക്കൽ കോളേജിൽ നിന്ന് ആവശ്യപ്പെട്ടതനുസരിച്ച് പാറശാല പൊലീസ് മജിസ്ട്രേറ്റിനെ ആശുപത്രിയിലെത്തിച്ച് ഷാരോണിന്റെ മൊഴി രേഖപ്പെടുത്തി. ഗ്രീഷ്മ നൽകിയ കഷായം കുടിച്ചിരുന്നതായും എന്നാൽ ഗ്രീഷ്മ തന്നെ അപായപ്പെടുത്തുമെന്ന് കരുതുന്നില്ലെന്നും മജിസ്‌ട്രേറ്റിന് മുന്നിൽ ഷാരോൺ മരണമൊഴി നൽകി.
● 2022 ഒക്ടോബർ 21

പൊലീസ് ഷാരോണിൻറെ മൊഴിയെടുത്തു.
● 2022 ഒക്ടോബർ 24

ഗുരുതരാവസ്ഥയിലായ ഷാരോണിനെ വെൻറിലേറ്ററിലേക്ക് മാറ്റി.
● 2022 ഒക്ടോബർ 25

വൈകീട്ട് 5.45-ന് ഷാരോൺ മരിച്ചു.
● 2022 ഒക്ടോബർ 27

അന്വേഷണം ആവശ്യപ്പെട്ട് ഷാരോണിൻറെ പിതാവ് പാറശാല പൊലീസിൽ പരാതി നൽകി.
● 2022 ഒക്ടോബർ 29

അന്വേഷണം ക്രൈംബ്രാഞ്ചിനു കൈമാറി.
● 2022 ഒക്ടോബർ 30

ഗ്രീഷ്മയെ പൊലീസ് വിളിച്ചു വരുത്തി ചോദ്യം ചെയ്തു. ഗ്രീഷ്മ കുറ്റം സമ്മതിച്ചു. ബന്ധുക്കളേയും പൊലീസ് ചോദ്യംചെയ്തു.
● 2022 ഒക്ടോബർ 31

ഗ്രീഷ്മയുടെ അറസ്റ്റ് രേഖപ്പെടുത്തി. പൊലീസ് സ്റ്റേഷനിലെ ശുചിമുറിയിൽ നിന്ന് അണുനാശിനി കുടിച്ച് ​ഗ്രീഷ്മ ആത്മഹത്യക്ക് ശ്രമിച്ചു. കേസിൽ ഗ്രീഷ്മയുടെ അമ്മ സിന്ധുവിനെയും അമ്മാവൻ നിർമൽകുമാറിനെയും പൊലീസ് കസ്റ്റഡിയിലെടുത്തു.
● 2022 നവംബർ 01

കീടനാശിനിയുടെ ബോട്ടിലും അതിലെ ലേബലും പ്രത്യേക അന്വേഷണസംഘം കണ്ടെടുത്തു.
● 2023 ജനുവരി 25

കേസിൽ പൊലീസ് കുറ്റപത്രം സമർപ്പിച്ചു.
● 2023 സെപ്റ്റംബർ 25

111 ദിവസത്തെ ജയിൽവാസത്തിനു ശേഷം ഹൈക്കോടതി ​ഗ്രീഷ്മക്ക് ജാമ്യം അനുവദിച്ചു.
● 2024 ഒക്ടോബർ 15

നെയ്യാറ്റിൻകര അഡീഷണൽ സെഷൻസ് കോടതിയിൽ വിചാരണ ആരംഭിച്ചു.
● 2025 ജനുവരി 03

ഒന്നാംപ്രതി ഗ്രീഷ്‌മയ്ക്കെതിരെയുള്ള കൊലപാതകക്കുറ്റവും ഗ്രീഷ്മയുടെ അമ്മ സിന്ധുവിനും അമ്മാവൻ നിർമലകുമാരൻ നായർക്കുമെതിരെ തെളിവുനശിപ്പിച്ച കുറ്റങ്ങളും തെളിഞ്ഞതായി സ്പെഷ്യൽ പബ്ലിക് പ്രോസിക്യൂട്ടർ വി എസ് വിനീത് കുമാർ വാദിച്ചു. കേസിൽ അന്തിമവാദം പൂർത്തിയായി, വിധി പറയാൻ മാറ്റി.
● 2025 ജനുവരി 17

ഗ്രീഷ്മയും അമ്മാവൻ നിർമലകുമാരൻ നായരും കുറ്റക്കാരെന്ന് നെയ്യാറ്റിൻകര കോടതി.