അന്ന് റഫീഖ ബിവി, ഇന്ന് ​ഗ്രീഷ്മ; വധശിക്ഷ വിധിച്ചത് അതേ ജഡ്ജി

നെയ്യാറ്റിൻകര: കേരളത്തിൽ വധശിക്ഷയ്‌ക്ക്‌ വിധിക്കപ്പെട്ട രണ്ടാമത്തെ സ്‌ത്രീയായി ഷാരോൺ വധക്കേസിലെ ഗ്രീഷ്‌മ. വിഴിഞ്ഞം ശാന്തകുമാരി വധക്കേസിലെ പ്രതിയായ റഫീക്ക ബീവിയാണ്‌ സംസ്ഥാനത്ത്‌ ആദ്യം വധശിക്ഷ ലഭിച്ച വനിത. ഈ രണ്ട്‌ കേസുകളിലും വിധിപറഞ്ഞത്‌ ഒരു ജഡ്‌ജി തന്നെയാണ്‌. നെയ്യാറ്റിന്‍കര അഡീഷണല്‍ ജില്ലാ ജഡ്ജി എ എം ബഷീറാണ്‌ രണ്ട്‌ തവണയും വിധി പറഞ്ഞത്.

ശാന്തകുമാരി വധക്കേസ്‌

വിഴിഞ്ഞം മുല്ലൂരിൽ ശാന്തകുമാരിയെ (74) കൊന്ന് സ്വർണാഭരണം കവർന്ന കേസിലാണ്‌ അയൽവാസിയായ റഫീക്കബീവിയേ കോടതി വധശിക്ഷയ്‌ക്ക്‌ വിധിച്ചത്‌. റഫീക്കബീവിയേയും മകനുമുൾപ്പെടെ മൂന്ന് പ്രതികൾക്കും കോടതി വധശിക്ഷ വിധിക്കുകയായിരുന്നു. വിഴിഞ്ഞം ടൗൺഷിപ് കോളനിയിൽ താമസിച്ച റഫീക്കബീവി തന്നെയായിരുന്നു കേസിലെ ഒന്നാംപ്രതി. സുഹൃത്തും പാലക്കാട് പട്ടാമ്പി സ്വദേശിയുമായ അൽ അമീൻ (27), റഫീക്കയുടെ മകനായ ഷെഫീഖ് (27) എന്നിവർ യഥാക്രമം കേസിലെ രണ്ട്‌ മൂന്നും പ്രതികളായി. അമ്മയ്ക്കും മകനും ഒരുമിച്ച് വധശിക്ഷ വിധിക്കുന്നതും ഇത്‌ ആദ്യമായായിരുന്നു. 2023 മെയ്‌ 22നായിരുന്നു വിധി വന്നത്‌.

വിധവയായ ശാന്തകുമാരി ഒറ്റയ്ക്കായിരുന്നു താമസിച്ചിരുന്നത്. അയൽവീട്ടിൽ വാടകക്കാരായി വന്ന പ്രതികൾ മോഷണം ലക്ഷ്യമിട്ട് 2022 ജനുവരി 14ന് രാവിലെ ഒമ്പതിന്‌ ശാന്തകുമാരിയെ കൊലപ്പെടുത്തുകയായിരുന്നു. ശാന്തകുമാരിയെ റഫീക്ക വാടകവീട്ടിലേക്ക് വിളിച്ചുവരുത്തി അൽ അമീന്റെയും ഷെഫീഖിന്റെയും സഹായത്തോടെ ഇരുമ്പ് ചുറ്റികകൊണ്ട് തലയ്ക്കടിച്ച് കൊലപ്പെടുത്തുകയാണുണ്ടായത്‌. അതേ ചുറ്റികകൊണ്ട് തലയിൽ പലതവണ അടിച്ച് അൽ അമീൻ മരണം ഉറപ്പുവരുത്തി. ലോക്കറ്റടക്കം സ്വർണമാല, വളകൾ, മോതിരം, കമ്മലുകൾ എന്നിവ കവർന്നശേഷം മൃതദേഹം വീടിന്റെ ആസ്ബസ്റ്റോസ് മേൽക്കുരയ്ക്കു താഴെയുള്ള തട്ടിൻപുറത്ത് ഒളിപ്പിച്ചു.

പ്രതികൾ വീടൊഴിഞ്ഞതിനു പിന്നാലെ അവിടെയെത്തിയ ഉടമ മുകളിൽനിന്ന് രക്തമൊഴുകുന്നതുകണ്ട് പരിശോധിച്ചപ്പോഴാണ് കൊലപാതക വിവരം പുറത്തറിഞ്ഞത്. 34 സാക്ഷികളെ വിസ്തരിച്ചു. 61 രേഖയും 34 തൊണ്ടിമുതലും കോടതിയിൽ ഹാജരാക്കി. വിഴിഞ്ഞം ഇൻസ്പെക്ടർ പ്രജീഷ് ശശിയാണ് കുറ്റപത്രം സമർപ്പിച്ചത്. പ്രോസിക്യൂഷനുവേണ്ടി പബ്ലിക് പ്രോസിക്യൂട്ടർ പാറശാല എ അജികുമാർ ഹാജരായി.

2024 മെയ്‌ 23ന്‌ വന്ന ദേശാഭിമാനി പത്രവാർത്ത

ഷാരോൺ വധക്കേസ്‌

പാറശാലയ്‌ക്കു സമീപം സമുദായപ്പറ്റ് ജെപി ഭവനിൽ ഷാരോൺ രാജിനെ 2022 ഒക്ടോബർ 14ന്‌ വീട്ടിൽ വിളിച്ചുവരുത്തി കഷായത്തിൽ കീടനാശിനി കലർത്തി ‘കഷായ ചലഞ്ച്’ എന്ന വ്യാജേന കുടിപ്പിച്ച്‌ കൊലപ്പെടുത്തിയെന്നാണ്‌ കേസ്‌. 2022 ഒക്ടോബർ 14ന്‌ ഗ്രീഷ്‌മ നൽകിയ കഷായം കുടിച്ച്‌ അവശനായ ഷാരോൺ ചികിത്സയിലിരിക്കെ 25നാണ്‌ മരിച്ചത്‌.

ഷാരോൺ കന്യാകുമാരി ജില്ലയിലെ നെയ്യൂർ ക്രിസ്‌ത്യൻ കോളേജ് ഓഫ് അലൈഡ് ഹെൽത്തിൽ ബിഎസ്‌സി റേഡിയോളജി അവസാനവർഷ വിദ്യാർഥിയായിരുന്നു. 2021ലാണ് ഷാരോണും ഗ്രീഷ്‌മയും സൗഹൃദത്തിലായത്. ഇരുവരും വീട്ടിലും പള്ളിയിലും താലികെട്ടി. ഗ്രീഷ്‌മയുടെ ആദ്യഭർത്താവ് മരിച്ചുപോകുമെന്ന്‌ ജ്യോത്സ്യൻ പ്രവചിച്ചതോടെ ഷാരോണിനെ ഒഴിവാക്കാൻ ശ്രമംതുടങ്ങി. മറ്റൊരാളുമായി ഗ്രീഷ്‌മയുടെ വിവാഹം ഉറപ്പിക്കുകയും ചെയ്‌തു. പിന്മാറാൻ ഷാരോൺ തയ്യാറാവാത്തതിനെ തുടർന്നാണ്‌ കൊലപാതകം.

ഗ്രീഷ്മ നല്‍കിയ കഷായം കുടിച്ചിരുന്നതായും എന്നാല്‍ ഗ്രീഷ്മ തന്നെ അപായപ്പെടുത്തുമെന്ന് കരുതുന്നില്ലെന്നും മജിസ്‌ട്രേറ്റിന് മുന്നില്‍ മരണമൊഴി നല്‍കുന്നതിനിടെ ഷാരോണ്‍ പറഞ്ഞിരുന്നു. ഇതാണ് അന്വേഷണ സംഘത്തിന് നിർണായകമായത്. ഫോറന്‍സിക് ഡോക്ടര്‍ കൈമാറിയ ശാസ്ത്രീയ തെളിവുകളും നിര്‍ണായകമായി. പൊലീസ് വിളിച്ചു വരുത്തി ചോദ്യം ചെയ്തപ്പോള്‍ ഗ്രീഷ്മ കുറ്റം സമ്മതിച്ചു. 2023 ജനുവരി 25നാണ് കേസില്‍ പൊലീസ് കുറ്റപത്രം സമര്‍പ്പിച്ചത്. കഴിഞ്ഞ വര്‍ഷം ഒക്ടോബര്‍ 15ന് തുടങ്ങിയ വിചാരണ ഈ മാസം മൂന്നിനാണ് അവസാനിച്ചത്. 95 സാക്ഷികളെയാണ് കേസില്‍ വിസ്തരിച്ചത്.

ഷാരോൺ വധക്കേസ് നാൾവഴികൾ

● 2022 ഒക്ടോബർ 14

ഗ്രീഷ്മ നൽകിയ കഷായം കുടിച്ചശേഷം ഛർദ്ദിച്ച് അവശ നിലയിലായ ഷാരോണിനെ പാറശാല താലൂക്ക് ആശുപത്രിയിൽ പ്രവേശിപ്പിക്കുന്നു. പിന്നീട് ഇവിടെ നിന്ന് തിരുവനന്തപുരം മെഡിക്കൽ കോളേജിലേക്ക് മാറ്റി.

● 2022 ഒക്ടോബർ 17

ആരോ​ഗ്യ നില വഷളായ ഷാരോണിന്റെ ആന്തരികാവയവങ്ങൾ തകരാറിലാകുന്നു. വായ്ക്കുള്ളിൽ വ്രണങ്ങൾ ഉണ്ടായി. വൃക്കകളുടെ പ്രവർത്തനം നിലച്ചതോടെ ഡയാലിസിസ് ട്രീറ്റ്മെന്റ് ആരംഭിച്ചു.

● 2022 ഒക്ടോബർ 20

മെഡിക്കൽ കോളേജിൽ നിന്ന് ആവശ്യപ്പെട്ടതനുസരിച്ച് പാറശാല പൊലീസ് മജിസ്ട്രേറ്റിനെ ആശുപത്രിയിലെത്തിച്ച് ഷാരോണിന്റെ മൊഴി രേഖപ്പെടുത്തി. ഗ്രീഷ്മ നൽകിയ കഷായം കുടിച്ചിരുന്നതായും എന്നാൽ ഗ്രീഷ്മ തന്നെ അപായപ്പെടുത്തുമെന്ന് കരുതുന്നില്ലെന്നും മജിസ്‌ട്രേറ്റിന് മുന്നിൽ ഷാരോൺ മരണമൊഴി നൽകി.

● 2022 ഒക്ടോബർ 21

പൊലീസ് ഷാരോണിന്റെ മൊഴിയെടുത്തു.

● 2022 ഒക്ടോബർ 24

ഗുരുതരാവസ്ഥയിലായ ഷാരോണിനെ വെൻറിലേറ്ററിലേക്ക് മാറ്റി.

● 2022 ഒക്ടോബർ 25

വൈകിട്ട് 5.45-ന് ഷാരോൺ മരിച്ചു.

● 2022 ഒക്ടോബർ 27

അന്വേഷണം ആവശ്യപ്പെട്ട് ഷാരോണിന്റെ പിതാവ് പാറശാല പൊലീസിൽ പരാതി നൽകി.

● 2022 ഒക്ടോബർ 29

അന്വേഷണം ക്രൈംബ്രാഞ്ചിനു കൈമാറി.

● 2022 ഒക്ടോബർ 30

ഗ്രീഷ്മയെ പൊലീസ് വിളിച്ചു വരുത്തി ചോദ്യം ചെയ്തു. ഗ്രീഷ്മ കുറ്റം സമ്മതിച്ചു. ബന്ധുക്കളേയും പൊലീസ് ചോദ്യംചെയ്തു.

● 2022 ഒക്ടോബർ 31

ഗ്രീഷ്മയുടെ അറസ്റ്റ് രേഖപ്പെടുത്തി. പൊലീസ് സ്റ്റേഷനിലെ ശുചിമുറിയിൽ നിന്ന് അണുനാശിനി കുടിച്ച് ​ഗ്രീഷ്മ ആത്മഹത്യക്ക് ശ്രമിച്ചു. കേസിൽ ഗ്രീഷ്മയുടെ അമ്മ സിന്ധുവിനെയും അമ്മാവൻ നിർമൽകുമാറിനെയും പൊലീസ് കസ്റ്റഡിയിലെടുത്തു.

● 2022 നവംബർ 01

കീടനാശിനിയുടെ ബോട്ടിലും അതിലെ ലേബലും പ്രത്യേക അന്വേഷണസംഘം കണ്ടെടുത്തു.

● 2023 ജനുവരി 25

കേസിൽ പൊലീസ് കുറ്റപത്രം സമർപ്പിച്ചു.

● 2023 സെപ്റ്റംബർ 25

111 ദിവസത്തെ ജയിൽവാസത്തിനു ശേഷം ഹൈക്കോടതി ​ഗ്രീഷ്മക്ക് ജാമ്യം അനുവദിച്ചു.

● 2024 ഒക്ടോബർ 15

നെയ്യാറ്റിൻകര അഡീഷണൽ സെഷൻസ് കോടതിയിൽ വിചാരണ ആരംഭിച്ചു.

● 2025 ജനുവരി 03

ഒന്നാംപ്രതി ഗ്രീഷ്‌മയ്ക്കെതിരെയുള്ള കൊലപാതകക്കുറ്റവും ഗ്രീഷ്മയുടെ അമ്മ സിന്ധുവിനും അമ്മാവൻ നിർമലകുമാരൻ നായർക്കുമെതിരെ തെളിവുനശിപ്പിച്ച കുറ്റങ്ങളും തെളിഞ്ഞതായി സ്പെഷ്യൽ പബ്ലിക് പ്രോസിക്യൂട്ടർ വി എസ് വിനീത് കുമാർ വാദിച്ചു. കേസിൽ അന്തിമവാദം പൂർത്തിയായി, വിധി പറയാൻ മാറ്റി.

● 2025 ജനുവരി 17

ഗ്രീഷ്മയും അമ്മാവൻ നിർമലകുമാരൻ നായരും കുറ്റക്കാരെന്ന് നെയ്യാറ്റിൻകര കോടതി.