പൊൻകുന്നത്ത് സ്കൂൾ ബസിൻ്റെ പുറകിൽ ശബരിമല തീർഥാടകരുടെ വാഹനം ഇടിച്ചുകയറി; നിരവധിപേര്‍ക്ക് പരിക്ക്

കാഞ്ഞിരപ്പള്ളി: കോട്ടയം പൊൻകുന്നത്ത് ശബരിമല തീർഥാടകരുടെ വാഹനം അപകടത്തിൽപ്പെട്ടു. സ്കൂൾ ബസിൻ്റെ പുറകിൽ അയ്യപ്പ ഭക്തർ സഞ്ചരിച്ച മിനി ബസ് ഇടിച്ചുകയറിയാണ് അപകടം. പാലാ - പൊൻകുന്നം റോഡിൽ ഒന്നാം മൈലിൽ വെള്ളി രാവിലെ 7.45 ഓടെയാണ് സംഭവം.

സ്കൂൾ ബസ് ഡ്രൈവർ പി കെ ചന്ദ്രൻ (56), ബസ് ജീവനക്കാരി പ്രിയ സലീഷ് (35), വിദ്യാർഥികളായ ആൻഡ്രിയ റിജോ (13), എ. ദേവനന്ദ (14), ലക്ഷ്മി ഭവാനി (13), ബംഗളൂരു സ്വദേശികളായ അയ്യപ്പഭക്തരായ ചന്ദ്രശേഖർ (46), വെങ്കിടേഷ് (45), ധൻജയ് (40), ഹരീഷ് കുമാർ (43), മഞ്ചുനാഥ് (32), സൗരവ് (17), വെങ്കിടേഷ് (38) എന്നിവർക്കും പരിക്കേറ്റു. ഇവരെ കാഞ്ഞിരപ്പള്ളി ജനറൽ ആശുപത്രിയിൽ പ്രവേശിപ്പിച്ചു.

കാഞ്ഞിരപ്പള്ളി സെൻ്റ് മേരീസ് സ്കൂൾ ബസ് ആണ് അപകടത്തിൽപ്പെട്ടത്.