കെ ജെ ഷൈനെതിരായ അപവാദപ്രചാരണം കോൺ​ഗ്രസ് എത്തിച്ചേർന്ന ജീർണത മറച്ചുവെക്കാൻ: എസ് സതീഷ്

കൊച്ചി: കോൺ​ഗ്രസ് എത്തിച്ചേർന്ന ജീർണത മറച്ചുവെക്കാനാണ് കെ ജെ ഷൈന് എതിരെ വ്യാജപ്രചാരണം നടത്തുന്നതെന്ന് സിപിഐ എം എറണാകുളം ജില്ലാ സെക്രട്ടറി എസ് സതീഷ്. രാഹുൽ മാങ്കൂട്ടത്തിലിൽ എംഎൽഎയ്ക്കെതിരെ ഉയർന്ന ​ഗുരുതര ആരോപണങ്ങളെ തുടർന്ന്, കോൺ​ഗ്രസിന്റെ ജീർണിച്ചമുഖം കേരളം തിരിച്ചറിഞ്ഞതാണ്. രാഹുലിനെതിരെ വെളിപ്പെടുത്തലുകൾ നടത്തിയ പെൺകുട്ടികളെ സോഷ്യൽമീഡിയയിലൂടെ അധിക്ഷേപിക്കുകയായിരുന്നു കോൺ​ഗ്രസ്. ഇരകളെ ആക്രമിക്കുന്നതാണ് കോൺ​ഗ്രസിന്റെ രീതി. രാഹുലിനെതിരെ നിലപാടെടുത്ത കോൺ​ഗ്രസ് വനിതാ നേതാക്കളെ പോലും ഹീനമായി ആക്ഷേപിച്ചു. ഇതിന്റെ തുടർച്ചയാണ് ഷൈന് എതിരായ വ്യാജപ്രചാരണമെന്നും സതീഷ് മാധ്യമങ്ങളോട് പറഞ്ഞു.

കേരളത്തിലെ അറിയപ്പെടുന്ന രാഷ്ട്രീയപ്രവർത്തകയാണ് കെ ജെ ഷൈൻ. അവർക്കെതിരെ പോലും ചിത്രം ഉൾപ്പെടെവെച്ച് വ്യാജമായ വാർത്തയാണ് സോഷ്യൽമീഡിയയിൽ കോൺ​ഗ്രസ് പ്രചരിപ്പിക്കുന്നത്. കോൺ​ഗ്രസ് നേതാക്കളുൾപ്പെടെ ഈ വ്യാജപ്രചാരണം ഏറ്റെടുത്തത് ​ഗൂഢാലോചനയുടെ ഭാ​ഗമാണെന്ന് വ്യക്തമായി. മുഖ്യമന്ത്രിക്കും ഡിജിപിക്കും വനിതാ കമീഷനും കെ ജെ ഷൈൻ പരാതി നൽകിയിട്ടുണ്ട്. നിയമപരമായും രാഷ്ട്രീയമായും ഇതിനെ നേരിടുമെന്നും സതീഷ് പറഞ്ഞു.