രത്തൻ കേൽക്കറിന്റെ നിയമനം ​ഗുരുതര വിഷയം; രാഹുൽ​ഗാന്ധി മറുപടി പറയണം: പി രാജീവ്

ന്യൂഡൽഹി: കേരളത്തിൽ നിയമസഭാ തെരഞ്ഞെടുപ്പ് നിയന്ത്രിച്ച രത്തൻ യു കേൽക്കറെ മുഖ്യമന്ത്രി വി ഡി സതീശന്റെ സെക്രട്ടറിയായി നിയമിക്കാനുള്ള തീരുമാനം ​ഗാരവമേറിയ വിഷയമെന്ന് സിപിഐ എം കേന്ദ്രകമ്മിറ്റിയം​ഗം പി രാജീവ്. തെരഞ്ഞെടുപ്പ് കമീഷന്റെ വിശ്വാസ്യത ചോദ്യം ചെയ്യുന്ന നിരവധി സംഭവങ്ങളുണ്ടായി. വോട്ടുകൊള്ള നടക്കുന്നുണ്ടെന്ന് കോൺ​ഗ്രസിന്റെ അഖിലേന്ത്യാ നേതാവ് രാഹുൽ​ഗാന്ധി തന്നെയാണ് ആരോപിച്ചിട്ടുള്ളത്. ഈ സാഹചര്യത്തിൽ എങ്ങനെയാണ് രത്തൻ ഖേൽക്കറുടെ നിയമനം യുഡിഎഫ് സർക്കാർ നടപ്പാക്കിയെന്നതിന് ഉത്തരം നൽകണമെന്നും രാജീവ് ഡൽഹിയിൽ മാധ്യമങ്ങളോട് പറഞ്ഞു.

പശ്ചിമ ബം​ഗാളിൽ തെരഞ്ഞെടുപ്പ് പ്രവർത്തനങ്ങൾക്ക് നേതൃത്വം നൽകിയ ഉദ്യോ​ഗസ്ഥനെ അവിടുത്തെ ബിജെപി സർക്കാർ ചീഫ് സെക്രട്ടറിയായി നിയമിച്ചതിനെ എതിർത്തയാളാണ് രാഹുൽ​ഗാന്ധി. 'വലിയ കൊള്ളയ്ക്ക് വലിയ പ്രതിഫലം' എന്നാണ് അന്ന് രാഹുൽ​ഗാന്ധി പ്രതികരിച്ചത്. അതേ രാ​ഹുൽ​ഗാന്ധി നയിക്കുന്ന കോൺ​ഗ്രസിന്റെ മുഖ്യമന്ത്രിയാണ് കേരളത്തിലുള്ളത്.

സാധാരണ ഇത്തരം കാര്യങ്ങളിൽ ഒരു കൂളിങ് പിരീഡ് എങ്കിലും ഉണ്ടാകാറുള്ളതാണ്. ഇവിടെ അതുപോലുമുണ്ടാകാതെ മുഖ്യമന്ത്രിയുടെ തന്നെ സെക്രട്ടറിയായി നിയമിക്കുന്നത് ആശങ്കപ്പെടുത്തുന്നതാണ്. പ്രത്യേകിച്ച്, തെരഞ്ഞെടുപ്പ് കമീഷനെക്കുറിച്ച് രാഹുൽ​ഗാന്ധിയുടെ പ്രതികരണം നിലനിൽക്കുന്ന സാഹചര്യത്തിൽ ഇതിന് ​ഗൗരവമേറും. കോൺ​ഗ്രസിന്റെ അഖിലേന്ത്യാ നേതൃത്വം രത്തൽ ഖേൽക്കറുടെ നിയമനത്തിൽ നിലപാട് വ്യക്തമാക്കണം. ബം​ഗാളിൽ എടുത്ത നിലപാട് തന്നെയാണോ കേരളത്തിലേതെന്ന് രാഹുൽ ​ഗാന്ധിയും മറുപടി നൽകണമെന്നും പി രാജീവ് ആവശ്യപ്പെട്ടു.