രാജ്ഭവൻ ഇനി മുതല്‍ ലോക് ഭവന്‍; ഉത്തരവിറക്കി കേന്ദ്ര ആഭ്യന്തര മന്ത്രാലയം

തിരുവനന്തപുരം: ഗവർണറുടെ ഔദ്യോഗിക വസതിയായ രാജ്ഭവന്റെ പേര് ലോക്ഭവന്‍ എന്നു പുനർ നാമകരണം ചെയ്യണമെന്ന ഉത്തരവ് പുറത്തിറക്കി കേന്ദ്ര ആഭ്യന്തര മന്ത്രാലയം. ഉത്തരവിന്റെ ഭാഗമായി അസം, ബംഗാള്‍ രാജ്ഭവനുകളുടെ പേര് മാറ്റി. കേരള രാജ്ഭവനും തിങ്കളാഴ്ച പുതിയ പേര് സ്വീകരിക്കും.

രാജ്ഭവന്‍ എന്നത് കൊളോണിയല്‍ സ്വാധീനമുള്ള പേരാണെന്ന വിലയിരുത്തലാണ് ഈ മാറ്റത്തിന് പിന്നിൽ. പേര് മാറ്റം മറ്റു സംസ്ഥാനങ്ങളിലും ഉടന്‍ നടപ്പിലാക്കുമെന്ന് ആഭ്യന്തര മന്ത്രാലയം വ്യക്തമാക്കി. ജനങ്ങളുടെ ഭവനം എന്നർത്ഥം വരുന്നതിനാലാണ് ലോക്ഭവന്‍ എന്ന പേര് മാറ്റം.

കേരള ഗവർണർ രാജേന്ദ്ര ആർലേക്കറാണ് രാജ്ഭവനുകളുടെ പേര് ലോക്ഭവൻ എന്നാക്കണമെന്ന് നിർദേശിച്ചത്. ലഫ്റ്റനന്റ് ഗവർണർമാരുടെ ഔദ്യോഗിക വസതിയായ രാജ്നിവാസിന്റെ പേര് ‘ലോക്നിവാസ്’ എന്നാക്കാനും തീരുമാനിച്ചിട്ടുണ്ട്.