സ്കൂൾ സമയമാറ്റത്തിൽ മാറ്റമില്ല; മുന്നോട്ടുപോകാൻ തീരുമാനം: വിദ്യാഭ്യാസമന്ത്രി

തിരുവനന്തപുരം: പുതിയ സ്കൂൾ സമയക്രമവുമായി സർക്കാർ മുന്നോട്ടുപോകുമെന്ന് വിദ്യാഭ്യാസമന്ത്രി വി ശിവൻകുട്ടി. വിവിധ മാനേജ്മെന്റ് സംഘടനകളുമായി നടത്തിയ ചർച്ചയ്ക്ക് ശേഷം വാർത്താസമ്മേളനത്തിലാണ് മന്ത്രി തീരുമാനം അറിയിച്ചത്.

ഏത് സാഹചര്യത്തിലാണ് സർക്കാർ തീരുമാനമെടുത്തതെന്ന് യോ​ഗത്തിൽ അറിയിച്ചുവെന്ന് മന്ത്രി പറഞ്ഞു. ഭൂരിപക്ഷംപേരും സർക്കാർ നിലപാടിനെ സ്വാ​ഗതം ചെയ്തു. 2025 മെയ് 31ലെ സർക്കാർ ഉത്തരവ് അനുസരിച്ച് 1 മുതൽ 4 വരെ ക്ലാസുകളിൽ 198 പ്രവൃത്തിദിനങ്ങളും, 5 മുതൽ 7 ക്ലാസുകളിൽ 200 പ്രവൃത്തിദിനങ്ങളും, 8 മുതൽ 10 ക്ലാസുകളിൽ 204 പ്രവൃത്തിദിനങ്ങളും ഉണ്ടാകണമെന്നാണ് ഉത്തരവ്. ഹൈക്കോടതിയുടെ കര്‍ശന ഉത്തരവിനെ തുടര്‍ന്നാണ് തീരുമാനമെടുത്തത്.

ചർച്ച നടത്തുകയെന്നത് ജനാധിപത്യസമീപനമാണ്. ഈ വർഷം ഇപ്പോൾ എടുത്ത തീരുമാനവുമായി സർക്കാർ മുന്നോട്ടുപോകും. പരാതികളുണ്ടെങ്കിൽ അടുത്ത അധ്യയനവർഷം പരിശോധിക്കാമെന്നും മന്ത്രി അറിയിച്ചു.