നവകേരള സദസ്: 229 വികസന പദ്ധതികൾക്ക് അന്തിമ അം​ഗീകാരം

തിരുവനന്തപുരം : നവകേരള സദസിൽ ഉയർന്നുവന്ന വികസന പദ്ധതികളുടെ അന്തിമ പട്ടിക അം​ഗീകരിച്ചു. ചീഫ് സെക്രട്ടറി അധ്യക്ഷനായ സമിതിയാണ് പട്ടിക അം​ഗീകരിച്ചത്. മുഖ്യമന്ത്രിയും മന്ത്രിമാരും 140 നിയമസഭാ മണ്ഡലങ്ങളിലും സഞ്ചരിച്ച് ജനങ്ങളുമായി സംവദിച്ചപ്പോൾ ഉരുത്തിരി‍ഞ്ഞ നിർദേശങ്ങളാണ് വികസന പദ്ധതികളായി നടപ്പാക്കുന്നത്. മലപ്പുറം ഒഴികെയുള്ള ജില്ലകളിലെ പദ്ധതികൾക്കാണ് അം​ഗീകാരമായത്. നിലമ്പൂർ ഉപതെരഞ്ഞെടുപ്പായതിനാൽ മലപ്പുറം ജില്ലയെ പരി​ഗണിച്ചിരുന്നില്ല.

13 ജില്ലകളിലെ 229 വികസന പദ്ധതികൾക്കായി 980.25 കോടി രൂപ സർക്കാർ ചെലവഴിക്കും. ജനങ്ങൾ ആവശ്യപ്പെട്ട വികസനങ്ങൾക്കും നിർദേശങ്ങൾക്കും മുൻഗണനപ്രകാരം അനുമതി നൽകാനും അധിക പദ്ധതികൾ അനുവദിക്കാനും ചീഫ് സെക്രട്ടറി, സെക്രട്ടറി (പിഐഇ ആൻഡ്‌ എംഡി), ബന്ധപ്പെട്ട കലക്ടർ എന്നിവരടങ്ങുന്ന കമ്മിറ്റിയെ ചുമതലപ്പെടുത്തിയിരുന്നു. ഈ കമ്മിറ്റിയാണ് അനുമതി നൽകിയത്.

ഓരോ മണ്ഡലത്തിലും പരമാവധി ഏഴ് കോടി വീതമാണ് അനുവദിക്കുക. ഓരോ മണ്ഡലത്തിലും രണ്ടു പദ്ധതികൾ വീതം മുൻ​ഗണനാ അടിസ്ഥാനത്തിൽ നടപ്പിലാക്കും.