‌‌‌എല്ലാ പ്രശ്നങ്ങളേയും ഒറ്റക്കെട്ടായി പരിഹരിച്ച് സമ്മേളനത്തിലേക്ക് നീങ്ങുകയാണ്- എം വി ​ഗോവിന്ദൻ

തിരുവനന്തപുരം: കേരളത്തിലെ പാർട്ടിക്കകത്ത് നിലനിൽക്കുന്ന എല്ലാ പ്രശ്നങ്ങളേയും ഒറ്റക്കെട്ടായി പരിഹരിച്ചുകൊണ്ട് സമ്മേളനത്തിലേക്ക് നീങ്ങുകയാണെന്ന് സിപിഐ എം സംസ്ഥാന സെക്രട്ടറി എം വി ​ഗോവിന്ദൻ. ദൗർബല്യങ്ങളടക്കമുള്ള കാര്യങ്ങളെ വിശദമായി പരിശോധിച്ചാണ് സമ്മേളനങ്ങൾ പൂർത്തീകരിച്ചതെന്നും എം വി ​ഗോവിന്ദൻ പറഞ്ഞു

ഇപ്രാവശ്യത്തെ സമ്മേളനത്തിന്റെ ഭാ​ഗമായി കഴിഞ്ഞ മൂന്ന് വർഷത്തെ പ്രവർത്തന റിപ്പോർട്ടിന് പുറമെ നവകേരളത്തിന്റെ പുതുവഴികൾ എന്ന രേഖ പിബി അം​ഗം പിണറായി വിജയൻ അവതരിപ്പിക്കും. കഴിഞ്ഞ സമ്മേളനത്തിന്റെ ഘട്ടത്തിൽ, നവകേരള വികസന രേഖ സമ്മേളനം വിശദമായി പരിശോധിച്ച് തയ്യാറാക്കിയ ഒന്നാണ്. ആ രേഖയിലെ കാഴ്ചപ്പാടുകൾ നടപ്പാക്കിയതിൽ പുതുസാഹചര്യത്തിൽ വരുത്തേണ്ട മാറ്റം സംബന്ധിച്ച് വിശദമായ ചർച്ച ഉദ്ദേശിക്കുന്നു. അതുവഴി എൽഡിഎഫ് സർക്കാരിന്റെ ദിശാബോധം നിർണയിക്കുന്ന കാഴ്ചപ്പാടുകൾ ഉരുത്തിരിഞ്ഞുവരുമെന്നാണ് പാർട്ടി കാണുന്നത്- ​ഗോവിന്ദൻ വ്യക്തമാക്കി.