print edition മൂരാട് പുതിയ റെയിൽവേ പാലം

വടകര: മലബാറിന്റെ റെയിൽ ഗതാഗത ചരിത്രത്തിൽ നിർണായക പങ്കുവഹിച്ച മൂരാട് പുഴയ്ക്ക് കുറുകെയുള്ള ബ്രിട്ടീഷ് കാലത്തെ പഴയ റെയിൽവേ പാലം വിടപറയുന്നു. ഈ പാതയിൽ പുതുതായി നിർമിച്ച റെയിൽവേ പാലം കമീഷൻ ചെയ്തു. ഇതോടെ 1901 മുതൽ മലബാറിലെ ട്രെയിൻ യാത്രക്കാരുടെ ആശ്രയമായിരുന്ന 125 വർഷത്തോളം പഴക്കമുള്ള ആദ്യപാലം പൂർണമായും വിശ്രമത്തിലേക്ക് മാറും.

​2003-–04 വർഷത്തിൽ പുതിയ പാലത്തിനുള്ള അനുമതി ലഭിച്ചെങ്കിലും സ്ഥലം ഏറ്റെടുക്കലിലെ തടസ്സം കാരണം നിർമാണം നീണ്ടുപോവുകയായിരുന്നു. 2017-ലാണ് നിർമാണ നടപടി വേഗത്തിലാക്കി സ്ഥലം ഏറ്റെടുത്ത് പാത ഉറപ്പിച്ചത്. ​പഴയ പാലത്തിന്റെ ബലക്ഷയത്തെ തുടർന്ന് വർഷങ്ങളായി ഇതുവഴി 20 കിലോമീറ്റർ വേഗം കുറച്ചാണ് ട്രെയിനുകൾ കടത്തിവിട്ടിരുന്നത്.

കരിങ്കല്ലിൽ അടിത്തറയും ആറ് സ്റ്റീൽ ഗർഡറുകളുമായാണ് പാലം നിർമിച്ചത്. 2001 വരെ കോഴിക്കോട് ഭാഗത്തേക്കും മംഗളൂരു ഭാഗത്തേക്കുമുള്ള എല്ലാ തീവണ്ടികളും സഞ്ചരിച്ചത് ഇതുവഴിയാണ്.

2001-ൽ ഇരട്ടപ്പാത വന്നതോടെ ഈ പാലത്തിലൂടെ മംഗളൂരു ഭാഗത്തേക്ക് മാത്രമാണ് ട്രെയിൻ ഓടിയത്. സെപ്‌തംബർ 30ഓടെ ഇത് വഴിയുള്ള ഓട്ടം പൂർണമായും നിലക്കും.

ഇതോടെ റെയിൽപ്പാളം ചരിത്രത്തിന്റെ ഭാഗമാവും. പുതിയ റെയിൽപ്പാളം കമീഷൻ ചെയ്യുന്നതിന്റെ ഭാഗമായി റെയിൽവേയുടെ ഉന്നത ഉദ്യോഗസ്ഥർ സ്ഥലത്തെത്തിയിരുന്നു.