നെയ്യ്, വെണ്ണ, പനീർ, ഐസ്ക്രീം; പാൽഉൽപ്പന്നങ്ങളുടെ വില കുറച്ച്‌ മിൽമ

തിരുവനന്തപുരം: മിൽമയുടെ ജനകീയമായ പാൽഉൽപ്പന്നങ്ങളുടെ വില തിങ്കൾ മുതൽ കുറച്ചു. നെയ്യ്, വെണ്ണ, പനീർ, ഐസ്ക്രീം തുടങ്ങി നൂറിലധികം ഉൽപ്പന്നങ്ങൾക്ക്‌ ഇളവ്‌ ഉണ്ടാകും. നെയ്യ്, വെണ്ണ, പനീർ എന്നിവയുടെ വില ഏഴ് ശതമാനത്തോളം കുറയും. ഐസ്ക്രീമിന് 12 മുതൽ 13 ശതമാനം വരെയാണ്‌ ഇളവ്‌. ഉപഭോക്താക്കളോടുള്ള ക്ഷീര സഹകരണ സംഘങ്ങളുടെ അർപ്പണ മനോഭാവമാണ് വിലക്കുറവിലൂടെ തെളിയിക്കുന്നതെന്ന്‌ മിൽമ ചെയർമാൻ കെ എസ് മണി പറഞ്ഞു.

നെയ്യ് ഒരു ലിറ്ററിന് 45 രൂപയാണ്‌ കുറയുക. പുതിയ വില 675 രൂപയാണ്‌. 370 രൂപയുണ്ടായിരുന്ന അര ലിറ്റർ നെയ്യ് 25 രൂപ കുറവിൽ 345 രൂപയ്ക്ക് നൽകും. 240 രൂപയുണ്ടായിരുന്ന 400 ഗ്രാം വെണ്ണ 15 രൂപ കുറഞ്ഞ് 225 രൂപയ്ക്ക് ലഭിക്കും. 500 ഗ്രാം പനീറിന്റെ വില 245 രൂപയിൽ നിന്ന് 234 രൂപയായി കുറയും. വാനില ഐസ്ക്രീമിന്റെ 220 രൂപയായിരുന്ന ഒരു ലിറ്ററിന്റെവില 196 രൂപയാക്കിയിട്ടുണ്ട്‌.