ഓണത്തിന്‌ കെഎസ്‌ആർടിസിയുടെ അധിക സർവീസ്‌ ; സ്‌പെഷ്യൽ ട്രെയിനുകൾ നാമമാത്രം

തിരുവനന്തപുരം

യാത്രക്കാരുടെ തിരക്ക്‌​ രൂക്ഷമായിട്ടും സ്​പെഷ്യൽ ട്രെയിനുകൾ പേരിന്‌ മാത്രം. ഓണക്കാലത്ത്​ ജനറൽ കമ്പാർട്ടുമെന്റുകളിലും ശ്വാസം മുട്ടിയാകും യാത്ര. രാത്രിവണ്ടികളിലും പകൽ സർവീസുകളിലുമെല്ലാം ജനറൽ കോച്ചുകൾ തിങ്ങിനിറഞ്ഞാണ്​ ​ഓടുന്നത്​. ശേഷിയുടെ നാലിരട്ടിയിലേറെ യാത്രക്കാർ ഒരു കോച്ചിലുണ്ട്‌. മണിക്കൂറുകളോളം നിന്ന്​ യാത്ര ചെയ്യേണ്ടിയും വരുന്നു. ദേശീയപാതയുടെ നിർമാണം നടക്കുന്നതിനാൽ കൂടുതൽപേരും തെരഞ്ഞെടുക്കുന്നത്‌ ട്രെയിനാണ്‌.

ചെന്നൈ– -കൊല്ലം, മംഗളൂരു- –തിരുവനന്തപുരം നോർത്ത്, മംഗളൂരു– കൊല്ലം, ചെന്നൈ–കണ്ണൂർ, മംഗളൂരു–പാലക്കാട്‌ വഴി ബംഗളൂരൂ റൂട്ടുകളിലാണ്​ റെയിൽവേ സ്​പെഷ്യൽ​ ട്രെയിനുകൾ അനുവദിച്ചിരുന്നത്​. ഈ ട്രെയിനുകളിൽ ആദ്യ ദിവസങ്ങളിൽത്തന്നെ ടിക്കറ്റ്​ തീർന്നു. പ്രതിദിന ട്രെയിനിലാകട്ടെ വെയിറ്റിങ്​ ലിസ്റ്റും നീളുന്നു.

ബംഗളൂരു, ചെന്നൈ, മുംബൈ എന്നിവിടങ്ങളിൽ നിന്നടക്കം ആയിരക്കണക്കിന്​ യാത്രക്കാരാണ്​ ഓണക്കാലത്ത്​ നാട്ടിലേക്ക്​ മടങ്ങാനുള്ള ടിക്കറ്റിനായി ബുദ്ധിമുട്ടുന്നത്‌. ഉയർന്ന നിരക്കാണ്​ ഉത്സവ സ്​പെഷ്യലുകളിൽ റെയിൽവേ ഈടാക്കുന്നത്​. തത്‌ക്കാലിനായി നീക്കിവെക്കുന്നതിൽ 50 ശതമാനം പ്രീമിയം തത്‌ക്കാലാണ്​. പ്രീമിയം തത്​ക്കാലിൽ ഓരോ പത്ത്​ ശതമാനം കഴിയുന്തോറും നിരക്ക്​ വർധിക്കും.

ബംഗളൂരു, മൈസൂരു, ചെന്നൈ എന്നിവിടങ്ങളിലേക്കും തിരിച്ചുമായി 96 സർവീസ്‌ കെഎസ്‌ആർടിസി അധികമായി അനുവദിച്ചിട്ടുണ്ട്‌. നിലവിൽ അങ്ങോട്ടുള്ള സർവീസുകളിൽ കാര്യമായ തിരക്കില്ലെന്ന്‌ ഓപ്പറേഷൻസ്‌ വിഭാഗം ഉദ്യോഗസ്ഥർ പറഞ്ഞു. ആവശ്യമെങ്കിൽ അധിക സർവീസുകൾ ഏർപ്പെടുത്തും.

​