കെഎസ്ഇബി ; കുടിശ്ശിക ഒറ്റത്തവണ തീർപ്പാക്കൽ 
ഇനി വെബ്പോര്‍ട്ടല്‍ വഴിയും

തിരുവനന്തപുരം

കെഎസ്ഇബി സെക്ഷൻ ഓഫീസ് സന്ദർശിക്കാതെ ലോടെൻഷൻ ഉപഭോക്താക്കൾക്ക് ഒറ്റത്തവണ തീർപ്പാക്കൽ പദ്ധതിയിൽ ഭാഗമാകാം. പദ്ധതിക്കായി പ്രത്യേക വെബ്പോർ‍ട്ടൽ നിലവിൽവന്നു.

പദ്ധതിയിലൂടെ രണ്ടു വർഷത്തിനുമുകളിൽ പഴക്കമുള്ള കുടിശ്ശികകളാണ് തീർപ്പാക്കാനാവുക. 10 കൊല്ലത്തിനുമുകളിൽ പഴക്കമുള്ള കുടിശ്ശികയുടെ 18 ശതമാനം നിരക്കിൽ വരുന്ന പലിശ പൂർണമായും ഒഴിവാക്കും. അഞ്ചു മുതൽ 10 വർഷംവരെയുള്ള കുടിശ്ശികയ്ക്ക് 18 ശതമാനത്തിനുപകരം നാലു ശതമാനം മാത്രമാണ്‌ പലിശ. രണ്ടു മുതൽ അഞ്ചു വർഷംവരെയുള്ള കുടിശ്ശികയ്ക്ക് 18 ശതമാനത്തിനുപകരം ആറു ശതമാനം പലിശ നൽകിയാൽ മതി. പലിശതുക ആറു മാസത്തെ തുല്യഗഡുക്കളായി അടയ്ക്കാനും അവസരമുണ്ട്. മുതലും പലിശയും ഒരുമിച്ച് അടച്ചുതീർക്കുന്നവർക്ക് മുതലിൽ അഞ്ചു ശതമാനം അധിക ഇളവും ലഭിക്കും. ദീർഘകാല കുടിശ്ശിക തീർപ്പാക്കാൻ കെഎസ്ഇബി ഇത്രയേറെ ഇളവുകൾ നൽകുന്നത് ഇതാദ്യമാണ്.

റവന്യൂ റിക്കവറി നടപടികൾ പുരോഗമിക്കുന്നതോ കോടതി വ്യവഹാര-ത്തിലുള്ളതോ ആയ കുടിശ്ശികകളും ഈ പദ്ധതിയിലൂടെ തീർപ്പാക്കാൻ അവസരമുണ്ട്. അത്തരം കുടിശ്ശികകൾ തീർപ്പാക്കുന്നതിന്, ലോ ടെൻഷൻ ഉപയോക്താക്കൾ അതത് സെക്ഷൻ ഓഫീസിലും ഹൈ ടെൻഷൻ ഉപയോക്താക്കൾ സ്‌പെഷ്യൽ ഓഫീസർ റവന്യൂ കാര്യാലയത്തിലുമാണ് ബന്ധപ്പെടേണ്ടത്. ലിങ്ക്‌: ots.kseb.in