തുടരും ഇ‍ൗ കരുതൽ

തലയോലപ്പറമ്പ്​

""മന്ത്രിയെ ഞങ്ങൾ എപ്പോഴും കാണാറുണ്ട്​. ഇടയ്‌ക്കിടെ ഇവിടെ വരാറുണ്ടല്ലോ. ചെയ്​തുതന്നതിലെല്ലാം വലിയ നന്ദിയുണ്ട്​.'' – പറഞ്ഞപ്പോൾ ഡി ബിന്ദുവിന്റെ അമ്മ സീതാലക്ഷ്മിയുടെ കണ്ണുകൾ നിറഞ്ഞിരുന്നു. ഇനിയും കൂടെയുണ്ടാകുമെന്ന്‌ വയോധികയെ ചേർത്തുപിടിച്ച്​ മന്ത്രി വി എൻ വാസവൻ ഉറപ്പുനൽകി.

കോട്ടയം മെഡിക്കൽ കോളേജ്​ ആശുപത്രിയിൽ ഉപയോഗശൂന്യമായ ശുചിമുറിക്കെട്ടിടം ഇടിഞ്ഞുവീണ്​ മരിച്ച തലയോലപ്പറമ്പ്​ ഉമ്മാംകുന്ന്​ മേപ്പത്തുകുന്നേൽ ഡി ബിന്ദുവിന്റെ കുടുംബത്തിന്​ സർക്കാരിന്റെ സഹായധനമായ 10 ലക്ഷം രൂപ നൽകാനായിരുന്നു മന്ത്രി എത്തിയത്​. തുക ബിന്ദുവിന്റെ ഭർത്താവ്​ വിശ്രുതന്​ കൈമാറി. അടിയന്തരസഹായമായി നൽകിയ 50,000 രൂപയ്​ക്ക്​​ പുറമെയാണിത്‌. ബിന്ദുവിന്റെ മകൻ നവനീതും അടുത്ത ബന്ധുക്കളും വീട്ടിലുണ്ടായിരുന്നു. മകൾ നവമി, ബിന്ദുവിന്റെ ചേച്ചിയുടെ മകൾ ദീപികയുടെ എറണാകുളം ഇടപ്പള്ളിയിലെ വീട്ടിൽ വിശ്രമത്തിലാണ്​.

""ഇപ്പോൾ ഒരു ബുദ്ധിമുട്ടുമില്ല. മന്ത്രിയും സി കെ ആശ എംഎൽഎയും എത്രയോ തവണ ഇ‍ൗ വീട്ടിൽ വന്നു. സർക്കാരിന്റേത്​ വളരെ നല്ല ഇടപെടലായിരുന്നു. എല്ലാം കൃത്യമായി ചെയ്​തുതന്നു. മകളുടെ ചികിത്സ നല്ലരീതിയിൽ സർക്കാർ നടത്തിത്തന്നു'' – വിശ്രുതൻ പറഞ്ഞു.

സി കെ ആശ എംഎൽഎ, കലക്ടർ ജോൺ വി സാമുവൽ, എഡിഎം എസ് ശ്രീജിത്ത്, സിപിഐ എം ഏരിയ സെക്രട്ടറി ഡോ. സി എം കുസുമൻ, വടയാർ വില്ലേജ് ഓഫീസർ മോളി ഡാനിയേൽ എന്നിവരും മന്ത്രിക്ക്‌ ഒപ്പമുണ്ടായി.