കെ എം ഷാജിയുടെ പ്രാഗിലേക്കുള്ള യാത്ര ദുരൂഹം: എം വിജിൻ

തിരുവനന്തപുരം: മന്ത്രി കെ എം ഷാജി ചെക്ക് റിപബ്ലിക്കിന്റെ തലസ്ഥാന ന​ഗരമായ പ്രാ​ഗിലേക്ക് അനുമതിയില്ലാതെ യാത്ര ചെയ്തത് ദുരൂഹമാണെന്നും രഹസ്യയാത്ര എന്തിനെന്ന് വ്യക്തമാക്കണമെന്നും ഡിവൈഎഫ്ഐ സംസ്ഥാന സെക്രട്ടറി എം വിജിൻ പറഞ്ഞു. ഓസ്‌ട്രിയ, ബൾഗേറിയ, സ്വിറ്റ്‌സർലന്റ്‌, യുഎഇ എന്നിവിടങ്ങളിൽ മന്ത്രി യാത്ര നടത്തിയെന്നാണ് നിയമസഭാ രേഖകളിലുള്ളത്. ഇതിൽ ചെക്ക് റിപബ്ലിക്കോ പ്രാ​ഗോ ഇല്ല. ഇത് വലിയ വീഴ്ചയാണെന്നും ചട്ടലംഘനമാണെന്നും അദ്ദേഹം പറഞ്ഞു.

കെ എം ഷാജിയുടെ വിദേശയാത്രയും റേഞ്ച് റോവറും നേരത്തെ വിവാദമായിരുന്നു. എന്നെല്ലാം അതിനെ ന്യായീകരിക്കുന്ന നിലപാടാണ് മന്ത്രി സ്വീകരിച്ചത്. പ്രാ​ഗിലേക്ക് പോയത് എന്തിനെന്ന് മന്ത്രി വ്യക്തമാക്കണം. പ്രാ​ഗിലെ ടൂറിസത്തെ കുറിച്ച് ​ഗൂ​ഗിളിൽ സെർച്ച് ചെയ്താൽ ചില വിവരങ്ങൾ കിട്ടും. അതിനാണോ മന്ത്രി പോയതെന്ന് വ്യക്തമാക്കണം. മന്ത്രിയുടെ യാത്രയുടെ സ്പോൺസർ ആരാണെന്നും വ്യക്തമാക്കണം. മദ്യ വ്യവസായി ആണ് യാത്ര സ്പോൺസർ ചെയ്തത് എന്നാണ് വാർത്ത. ഇതിൽ മുസ്ലീം ലീ​ഗിന്റെ നിലപാട് അറിയാൻ താൽപര്യമുണ്ടെന്നും വിജൻ പറഞ്ഞു.

അതേസമയം ദുരൂഹ യാത്രയെ കുറിച്ച് മന്ത്രി ഇതുവരെ പ്രതികരിച്ചിട്ടില്ല. കെ എം ഷാജിയുടെ റേഞ്ച് റോവർ വിവാദം മുസ്ലിം ലീഗിനുള്ളിൽ അതൃപ്തി പുകയുമ്പോഴാണ് പുതിയ വിവാദം ഉയരുന്നത്.