മന്ത്രി കെ എം ഷാജിയുടെ ആഡംബര വാഹന യാത്ര; ട്രാൻസ്പോർട്ട് കമീഷണർക്ക് പരാതി

തിരുവനന്തപുരം: നിയമവിരുദ്ധമായി ആഡംബര വാഹനം ഉപയോ​ഗിച്ച് വിവാദത്തിലായ മന്ത്രി കെ എം ഷാജിക്കെതിരെ അഭിഭാഷകന്‍ പരാതി. അഭിഭാഷകൻ അതുൽ ടോമാണ് പരാതിയുമായി രം​ഗത്തെത്തിയത്. എല്ലാ വശങ്ങളും സമ​ഗ്രമായി പരിശോധിച്ച് റിപ്പോർട്ട് നൽകണമെന്നും അഭിഭാഷകൻ പരാതിയിൽ ആവശ്യപ്പെട്ടു. കെ എം ഷാജി ഉപയോ​ഗിച്ച വാഹനമായ കെഎൽ 78, A0009 റേഞ്ച് റോവറിന്റെ രജിസ്ട്രേഷൻ സർട്ടിഫിക്കറ്റ്, ഫിറ്റ്നസ് സർട്ടിഫിക്കറ്റ്, രജിസ്ട്രേഷനും പെർമിറ്റും ഒപ്പം രജിസ്ട്രേഷൻ വിഭാ​ഗം( നോൺ ട്രാൻസ്പോർട്ട്, ട്രാൻസ്പോർ‌ട്ട്, പ്രെെവറ്റ് എന്ന പരിശോധന), കൂടാതെ സെക്ഷൻ 52 പ്രകാരം ഏതെങ്കിലും തരത്തിൽ വാഹനത്തിൽ മാറ്റം വരുത്തിയിട്ടുണ്ടോ എന്നും പരിശോധിക്കണം- പരാതിയില്‍ പറയുന്നു.

കൃത്യമായ അനുമതി ഇല്ലാതെ വാഹനത്തിൽ സംസ്ഥാന ചിഹ്നം,( ഔദ്യോ​ഗിക നമ്പറായ 13), ദേശീയപതാ കുത്തിവെയ്ക്കുക, ബീക്കൺ ലെെറ്റുകൾ ഉപയോ​ഗിച്ചിരുന്നോ തുടങ്ങി പദവി ചിഹ്നങ്ങൾ എന്തെങ്കിലും ഉപയോ​ഗിച്ചിരുന്നോ എന്നുള്ള നേരിട്ടുള്ള പരിശോധന നടത്തണം. ഇതിനായി 1988 മോട്ടോർവെഹിക്കിൾ ആക്ടിലെ വകുപ്പ് 52, 177, 190 , 192, 192A എന്ന, കേസിന് അനുയോജ്യമായ കേന്ദ്ര /കേരള നിയമങ്ങളും പരിശോധനയില്‍ ഉൾപ്പെടുത്തണം.

വാഹനം വാടകയ്ക്കാണോ പാരിതോഷികമായാണോ സ്വീകരിച്ചത് , നിയമത്തിലെ വകുപ്പ് 66 ലംഘിച്ച് സാധുവായ പെർമിറ്റ് ഇല്ലാതെ ഒരു മൂന്നാം കക്ഷിയുടെ ഉപയോഗത്തിനായി വിട്ടുകൊടുത്തോ എന്നും പരിശോധിക്കണം. ഉണ്ടെങ്കിൽ കൃത്യമായ നടപടി സ്വീകരിക്കണമെന്നും അതുലിന്റെ പരാതിയിൽ പറയുന്നു. പരിശോധനാ പ്രകാരം എന്തെങ്കിലും തെറ്റ് ചെയ്തതായി കണ്ടെത്തിയാൽ നിയമപ്രകാരമുള്ള നടപടിയായ രജിട്രേഷൻ സർട്ടിഫിക്കറ്റോ വാഹ​നമോ പിടിച്ചെടുക്കുകയും ഭാരതീയ ന്യായ സംഹിത പ്രകാരം 2023ലെ , മേൽപ്പറഞ്ഞ വകുപ്പുകൾ പ്രകാരം, കേസ് നിലനിൽക്കുന്ന പരിധിയിലെ പൊലീസിന് പ്രാഥമിക അന്വേഷണ റിപ്പോർട്ട് തയ്യാറാകുന്നതിനായി കെെമാറുകയും ചെയ്യേണ്ടതാണെന്നും ട്രാൻസ്പോർട്ട് കമീഷണർ‌ക്ക് നൽകിയ പരാതിയിൽ അഭിഭാഷകൻ വ്യക്തമാക്കി.

മന്ത്രിസ്ഥാനം ഏറ്റെടുത്തതിന് തൊട്ടുപിന്നാലെയാണ് ഷാജി സുഹൃത്തായ യാക്കൂബിന്റെ KL 78 A 0009 നമ്പർ റേഞ്ച് റോവർ ഔദ്യോഗിക വാഹനമായി ഉപയോഗിച്ചത്. ഇത് വലിയ രാഷ്ട്രീയ വിവാദങ്ങൾക്ക് വഴിവെച്ചു. സർക്കാർ അനുവദിച്ച ഔദ്യോഗിക വാഹനമായ ഇന്നവോ ക്രിസ്റ്റയ്ക്കു പകരം ലക്ഷങ്ങൾ വിലമതിക്കുന്ന സ്വകാര്യ ആഡംബരക്കാറിൽ സംസ്ഥാന സർക്കാരിന്റെ ബോർഡും 13 നമ്പറും പതിപ്പിച്ച് യാത്രചെയ്തതിനെ ഡിവൈഎഫ്ഐ. ഉൾപ്പെടെയുള്ള സംഘടനകൾ ചോദ്യംചെയ്തു.

തനിക്ക് ലഭിച്ച ഇന്നോവ ക്രിസ്റ്റ നാലുലക്ഷത്തിലധികം കിലോമീറ്റർ ഓടിയതാണെന്നും ദീർഘദൂര സഞ്ചാരത്തിന് യോഗ്യമല്ലെന്നും പറഞ്ഞാണ് ഷാജി ആരോപണത്തെ നേരിട്ടത്. ഇതിനായി സർക്കാരിൽനിന്ന് ഇന്ധനച്ചെലവോ വാടകയോ വാങ്ങിയിട്ടില്ലെന്നും മന്ത്രിയുടെ ഓഫീസ് അറിയിച്ചിരുന്നു. എന്നാല്‍ നിയമവിരുദ്ധമായാണ് വാഹനം ഉപയോഗിച്ചതെന്നതെളിവുകള്‍ പുറത്തുവന്നതോടെ ഉടമയ്ക്കുതന്നെ തിരിച്ചുനൽകുകയായിരുന്നു.