കേരള സര്‍വകലാശാല: സിന്‍ഡിക്കറ്റ് യോ​ഗത്തോട് മുഖംതിരിച്ച് വിസി

തിരുവനന്തപുരം: കേരള സർവകലാശാലയിൽ സിൻഡിക്കറ്റ് യോ​ഗം വിളിക്കണമെന്ന ആവശ്യത്തിൽ ഒരാഴ്ച കഴിഞ്ഞിട്ടും മറുപടി അറിയിക്കാതെ താൽക്കാലിക വിസി ഡോ. മോഹനൻ കുന്നുമ്മൽ. സിൻഡിക്കറ്റിന്റെ അധികാരം വിസ്മരിച്ച് സ്വന്തംനിലയ്ക്ക് നടപടിയെടുക്കുന്ന തിരക്കിലാണ് വിസി. സർവകലാശാല ഉദ്യോ​ഗസ്ഥർക്ക് കാരണം കാണിക്കൽ നോട്ടീസ് നൽകാൻ വിസിക്ക് അധികാരമുണ്ടെങ്കിലും അതിൽ നടപടിയെടുക്കേണ്ടത് സിൻഡിക്കറ്റാണ്. എന്നാൽ, ചട്ടം പാലിക്കാതെ രജിസ്ട്രാർക്കും ജോയിന്റ് രജിസ്ട്രാർക്കുമെതിരെ നടപടിയെടുക്കാൻ തിടുക്കംകൂട്ടുകയാണ് കുന്നുമ്മൽ.

ഇതിനാണ് സിൻഡിക്കറ്റ് യോ​ഗം ചേരുന്നത് വൈകിപ്പിക്കുന്നതെന്നും ആക്ഷേപമുണ്ട്.

60 ദിവസത്തിനുള്ളിൽ സിൻഡിക്കറ്റ് ചേരണമെന്നാണ് ചട്ടം. മെയ് 27നാണ് അവസാനം സിൻഡിക്കറ്റ് യോ​ഗം ചേർന്നത്. ഇതുപ്രകാരം ഈ മാസം 27ന് യോ​ഗം ചേരേണ്ടതാണ്. സിൻഡിക്കറ്റ് ചേരാനായി 18ന് അം​ഗങ്ങൾ വിസിക്ക് നിവേദനം നൽകിയിരുന്നു. സർവകലാശാല ഭരണസമിതികളുടെ തീരുമാനങ്ങൾ വിസി നടപ്പാക്കണമെന്നാണ് ചട്ടം. ഇത് പാലിച്ചില്ലെങ്കിൽ വിസിക്കെതിരെ സിൻഡിക്കറ്റ് അം​ഗങ്ങൾ കോടതിയെ സമീപിച്ചേക്കും.