നിങ്ങൾ കേരളത്തിലായത് നന്നായി; മൊണാലിസയോട് കേരള ഹൈക്കോടതി

കൊച്ചി: മധ്യപ്രദേശിൽ രജിസ്റ്റർ ചെയ്ത ക്രിമിനൽ കേസിൽ കുംഭമേള വൈറൽ താരം മൊണാലിസ ഭോസ്ലെയും ഭർത്താവ് മുഹമ്മദ് ഫർമാൻ ഖാനും സമർപ്പിച്ച മുൻകൂർ ജാമ്യാപേക്ഷയിൽ കേരള ഹൈക്കോടതി വിധി പറയാൻ മാറ്റി. കേസിൽ നാളെ ഉത്തരവ് പുറപ്പെടുവിക്കാമെന്ന് ജസ്റ്റിസ് കൗസർ എടപ്പഗത്ത് സൂചിപ്പിച്ചു. ഹർജി പരിഗണിക്കവെ, ദമ്പതികൾ നിലവിൽ കേരളത്തിൽ ആയിരിക്കുന്നത് വലിയ ഭാഗ്യമാണെന്ന് ജഡ്ജി നിരീക്ഷിച്ചു. മിശ്രവിവാഹത്തിന്റെ പേരിൽ മധ്യപ്രദേശിലെ ചില ഭാഗങ്ങളിൽ നിന്ന് ദമ്പതികൾ നേരിടുന്ന കടുത്ത ഭീഷണികൾ കണക്കിലെടുത്തായിരുന്നു കോടതിയുടെ ഈ പരാമർശം.

മൊണാലിസ പ്രായപൂർത്തിയാകാത്ത ആളാണെന്ന തെറ്റായ അവകാശവാദങ്ങൾ ഉന്നയിച്ച് മതമൗലികവാദ ഗ്രൂപ്പുകളും മധ്യപ്രദേശ് സർക്കാരും തങ്ങളെ വേട്ടയാടാൻ പരമാവധി ശ്രമിക്കുകയാണെന്ന് ദമ്പതികൾക്ക് വേണ്ടി ഹാജരായ അഭിഭാഷകൻ എം ശശീന്ദ്രൻ കോടതിയെ അറിയിച്ചു. മൊണാലിസ വിവാഹം കഴിക്കുമ്പോൾ അവർക്ക് 18 വയസ്സ് പൂർത്തിയായിരുന്നുവെന്നും അദ്ദേഹം വാദിച്ചു. എന്നാൽ, വിഷയം വിവാദമായതിനെത്തുടർന്ന് അവർക്ക് പ്രായപൂർത്തിയായിട്ടില്ലെന്ന് വരുത്തിത്തീർക്കാൻ ഔദ്യോഗിക ജനന സർട്ടിഫിക്കറ്റ് പോലും അധികൃതർ പിൻവലിക്കുകയുണ്ടായി. മധ്യപ്രദേശിലെ മുഴുവൻ സംസ്ഥാന സംവിധാനങ്ങളെയും ദുരുപയോഗം ചെയ്തുകൊണ്ടാണ് ഇത്തരം നീക്കങ്ങൾ നടത്തുന്നതെന്നും, ഭരണകൂടവും മൗലികവാദ ഗ്രൂപ്പുകളും ഒത്തുചേർന്ന് ഹർജിക്കാർക്കെതിരെ തിരിഞ്ഞിരിക്കുകയാണെന്നും അഭിഭാഷകൻ കോടതിയിൽ വ്യക്തമാക്കി.

ഈ സാഹചര്യത്തിലാണ് "നിങ്ങൾ കേരളത്തിൽ ആയത് ഭാഗ്യം," എന്ന് ജസ്റ്റിസ് എടപ്പഗത്ത് അഭിപ്രായപ്പെട്ടത്. ഇതിന് മറുപടിയായി, "അതെ, ഞങ്ങൾ ഇപ്പോൾ ജീവിച്ചിരിക്കുന്നതിന്റെ ഒരേയൊരു കാരണം അതുമാത്രമാണ്," എന്ന് അഭിഭാഷകൻ ശശീന്ദ്രൻ കോടതിയിൽ പറഞ്ഞു. അതേസമയം, ഫർമാൻ ഖാൻ മുസ്ലീം ആയതിനാൽ ഹിന്ദു ക്ഷേത്രത്തിൽ വെച്ചുനടന്ന ഈ വിവാഹം നിയമവിരുദ്ധമാണെന്നും, വിവാഹസമയത്ത് മൊണാലിസയ്ക്ക് പ്രായപൂർത്തിയായിരുന്നില്ലെന്നും മധ്യപ്രദേശ് സർക്കാരിന് വേണ്ടി ഹാജരായ അഡീഷണൽ സോളിസിറ്റർ ജനറൽ (എഎസ്ജി) എസ് വി രാജു വാദിച്ചു. എന്നാൽ പെൺകുട്ടിക്ക് ഭർത്താവിനെതിരെ യാതൊരുവിധ പരാതിയുമില്ലാത്ത സാഹചര്യത്തിൽ സർക്കാരിന്റെ വാദങ്ങൾ ശരിയാണെന്ന് തോന്നുന്നില്ലെന്ന് ജസ്റ്റിസ് കൗസർ എടപ്പഗത്ത് വ്യക്തമാക്കി. കേസിൽ നാളെത്തന്നെ കോടതി അന്തിമ ഉത്തരവ് പുറപ്പെടുവിച്ചേക്കും.