print edition ചുമട്ടുതൊഴിലാളികളുടെ ഉശിരൻ സെക്രട്ടറിയറ്റ്‌ മാർച്ച്‌; തൊഴിലാളിദ്രോഹ നടപടികൾ അവസാനിപ്പിക്കണം: ടി പി രാമകൃഷ്ണൻ

തിരുവനന്തപുരം : തൊഴിൽ സംരക്ഷണം ഉറപ്പാക്കാതെ സർക്കാർ തുടരുന്ന തൊഴിലാളിദ്രോഹ നടപടികൾ അവസാനിപ്പിക്കണമെന്ന്‌ സിഐടിയു സംസ്ഥാന പ്രസിഡന്റ് ടി പി രാമകൃഷ്ണൻ. തൊഴിലാളി വിരുദ്ധ ലേബർ കോഡ്‌ നടപ്പാക്കില്ലെന്ന്‌ പ്രഖ്യാപിച്ച മുൻ എൽഡിഎഫ്‌ സർക്കാർ പുതിയ നിയമ നിർമാണമെന്ന നിർദേശം മുന്നോട്ടുവച്ചു. ഇതിന്‌ അനുസൃതമായ നടപടി യുഡിഎഫ്‌ സർക്കാർ സ്വീകരിക്കുന്നില്ല. ആയിരക്കണക്കിന്‌ തൊഴിലാളികളെ പിരിച്ചുവിടുകയാണെന്നും ടി പി രാമകൃഷ്ണൻ പറഞ്ഞു.

കേരള സ്റ്റേറ്റ് ഹെഡ് ലോഡ് ആൻഡ്‌ വർക്കേഴ്സ് ഫെഡറേഷൻ (സിഐടിയു) സെക്രട്ടറിയറ്റ്‌ മാർച്ച്‌ ഉദ്‌ഘാനം ചെയ്യുകയായിരുന്നു അദ്ദേഹം. പുതിയ ചുമട്ടുതൊഴിലാളി ക്ഷേമ ബോർഡ് രൂപീകരിക്കാൻ സർക്കാർ നടപടിയെടുക്കുന്നില്ല. ബോർഡിനെ ഇല്ലാതാക്കാനുള്ള നീക്കമാണ്‌ നടത്തുന്നത്‌. തൊഴിൽ സംരക്ഷണം ഉറപ്പാക്കുന്ന തീരുമാനം സർക്കാർ നയത്തിന്റെ ഭാഗമായി നടപ്പാക്കണമെന്നും അദ്ദേഹം പറഞ്ഞു.

ഫെഡറേഷൻ വൈസ്‌ പ്രസിഡന്റ്‌ സി കെ മണിശങ്കർ അധ്യക്ഷനായി. ഫെഡറേഷൻ ജനറൽ സെക്രട്ടറി ആർ രാമു, ട്രഷറർ എൻ സുന്ദരം പിള്ള, സി ജയൻ ബാബു, എ എം ഇക്ബാൽ, കെ സി രാജഗോപാൽ, കെ എൻ മോഹനൻ, കെ എം അഷറഫ്, സി നാസർ, കോശി അലക്സ് എന്നിവർ സംസാരിച്ചു. ചുമട്ടുതൊഴിലാളി ക്ഷേമ ബോർഡ് അടിയന്തരമായി രൂപീകരിക്കണം എന്നതടക്കമുള്ള ആവശ്യങ്ങളുന്നയിച്ച്‌ നടന്ന മാർച്ചിൽ നൂറുകണക്കിന്‌ തൊഴിലാളികൾ അണിനിരന്നു.