കലാഭവൻ നവാസിന്​ നാട്​ വിടയേകി

കൊച്ചി

നടനും മിമിക്രി കലാകാരനുമായ കലാഭവൻ നവാസിന്​ നാടിന്റെ അന്ത്യാഞ്​ജലി. നവാസിന്റെ മൃതദേഹം ശനി രാവിലെ എറണാകുളം ഗവ. മെഡിക്കൽ കോളേജ്​ ആശുപത്രിയിൽ പോസ്റ്റുമോർട്ടത്തിനുശേഷം ഒന്നേമുക്കാലോടെ ആലുവ നാലാംമൈലിലെ ‘നെസ്റ്റ്’ ​​വീട്ടിലെത്തിച്ചു. പൊതുദർശനത്തിന്​ വച്ച മൃതദേഹത്തിൽ കല–സാംസ്കാരിക–രാഷ്​ട്രീയ മേഖലയിലെ പ്രമുഖർ ഉൾപ്പെടെ നിരവധിപേർ ആദരാഞ്​ജലി അർപ്പിച്ചു.

വ്യവസായമന്ത്രി പി രാജീവ്​​​ സംസ്ഥാന സർക്കാരിനുവേണ്ടി ആദരാഞ്​ജലി അർപ്പിച്ചു​. ഹൈബി ഇ‍ൗഡൻ എംപി, അഭിനേതാക്കളായ ശ്വേത മേനോൻ, സിദ്ദിഖ്​, ജയസൂര്യ, സായ്​കുമാർ, ലാൽ, ദേവൻ, രമേഷ്​ പിഷാരടി, കലാഭവൻ ഷാജോൺ, കലാഭവൻ പ്രസാദ്​, വിനോദ്​ കോവൂർ, മണികണ്​ഠൻ പട്ടാമ്പി, സലിം ഹസ്സൻ, ആലുവ നഗരസഭാ ചെയർമാൻ എം ഒ ജോൺ, സിപിഐ എം ആലുവ ഏരിയ സെക്രട്ടറി എ പി ഉദയകുമാർ തുടങ്ങിയവരും അന്ത്യോപചാരം അർപ്പിച്ചു. വൈകിട്ട്​ നാലോടെ ആലുവ ട‍ൗൺ ജുമാ മസ്​ജിദിൽ എത്തിച്ചു. പൊതുദർശനത്തിനുശേഷം ആറോടെ ഖബറടക്കി.

വെള്ളി രാത്രിയാണ്​ നവാസിനെ ചോറ്റാനിക്കര ഗവ. ഹൈസ്‌കൂൾ മൈതാനത്തിന് എതിർവശത്തെ ഹോട്ടൽ മുറിയിൽ മരിച്ചനിലയിൽ കണ്ടെത്തിയത്. ‘പ്രകമ്പനം' സിനിമയുടെ ഷൂട്ടിങ്ങിനായാണ് നവാസ് ഹോട്ടലിൽ താമസിച്ചിരുന്നത്.