print edition പൊതുയോഗങ്ങൾ 
തടസ്സപ്പെടുത്തിയാൽ 
3 മാസം തടവ്‌

തിരുവനന്തപുരം: തെരഞ്ഞെടുപ്പ്‌ പൊതുയോഗങ്ങൾ തടസ്സപ്പെടുത്തുകയോ യോഗസ്ഥലത്ത് ക്രമരഹിതമായി പ്രവർത്തിക്കുകയോ ചെയ്യുന്നവർക്ക്‌ മൂന്നുമാസം വരെ തടവോ ആയിരം രൂപ വരെ പിഴയോ അല്ലെങ്കിൽ രണ്ടുംകൂടിയോ ശിക്ഷ ലഭിക്കുമെന്ന്‌ സംസ്ഥാന തെരഞ്ഞെടുപ്പ് കമീഷണർ എ ഷാജഹാൻ. രാഷ്ട്രീയസ്വഭാവമുള്ള ഏതു പൊതുയോഗത്തിനും ഇത് ബാധകമാണ്. പ്രചാരണ ജാഥകളും പൊതുയോഗങ്ങളും സംഘടിപ്പിക്കുന്നത് ക്രമസമാധാനം പാലിച്ചും നിയമ വ്യവസ്ഥകളും കോടതി ഉത്തരവുകളും പാലിച്ചായിരിക്കണം. പൊതുയോഗത്തിന്റെ സ്ഥലവും സമയവും പൊലീസിനെ മുൻകൂട്ടി അറിയിക്കണം. അനുയായികൾ മറ്റുകക്ഷികളുടെ യോഗങ്ങളും ജാഥകളും തടസപ്പെടുത്തുന്നില്ലെന്ന്‌ രാഷ്ട്രീയകക്ഷികളും, സ്ഥാനാർഥികളും ഉറപ്പാക്കണം.

തങ്ങളുടെ കക്ഷിയുടെ ലഘുലേഖവിതരണം ചെയ്തോ, നേരിട്ടോ രേഖാമൂലമായോ ചോദ്യങ്ങൾ ഉന്നയിച്ചോ, മറ്റൊരു രാഷ്ട്രീയകക്ഷിയുടെ പൊതുയോഗങ്ങളിൽ പ്രശ്നങ്ങൾ സൃഷ്ടിക്കരുത്‌. ഒരു രാഷ്ട്രീയകക്ഷിയുടെ യോഗം നടന്നുകൊണ്ടിരിക്കുന്ന സ്ഥലത്തു കൂടി മറ്റൊരു രാഷ്ട്രീയകക്ഷി ജാഥ നടത്തരുത്‌. എതിർ സ്ഥാനാർഥിയുടെ ചുവർപരസ്യങ്ങൾ നീക്കരുത്. അനുവദനീയമായ ശബ്ദത്തിൽ മാത്രമേ ഉച്ചഭാഷിണികൾ പ്രവർത്തിപ്പിക്കാവൂ. വാഹന ഗതാഗതത്തിന് തടസ്സമാകാത്ത വിധത്തിൽ വേണം ജാഥകൾ സംഘടിപ്പിക്കാൻ. പ്രകോപനത്തിന്‌ സാധ്യതയുള്ള വസ്തുക്കൾ ജാഥയിൽ കൊണ്ട് പോകരുത്‌.

adnne xhoikkalallaeമറ്റ് രാഷ്ട്രീയ പാർടി നേതാക്കളുടെ കോലം കൊണ്ട് നടക്കുന്നതും കത്തിക്കുന്നതും കുറ്റകരമാണ്. പ്രചാരണ പ്രവർത്തനങ്ങൾ സമാധാനപൂർണമാക്കാൻ രാഷ്ട്രീയ പാർടികളും സ്ഥാനാർഥികളും അതീവ ജാഗ്രത പുലർത്തണമെന്നും സംസ്ഥാന തെരഞ്ഞെടുപ്പ് കമീഷണർ നിർദേശിച്ചു.