കൊച്ചി വിമാനത്താവളം വഴിയുള്ള 
വിദേശ തപാൽ സേവനം നിർത്തുന്നു

തൃശൂർ

കൊച്ചി അന്താരാഷ്​ട്ര വിമാനത്താവളം വഴിയുള്ള വിദേശ തപാൽ സേവനവും നിർത്തലാക്കാനുള്ള നീക്കത്തിലാണ്‌. മെയിൽ ആൻഡ്​​ പാഴ്​സൽ ഒപ്റ്റിമൈസേഷൻ പ്രോജക്ടിന്റെ (എംപിഒപി) ഭാഗമായാണ്​ നീക്കം. പുതിയ വിദേശ മെയിൽ ശൃംഖലയുടെ കരട്​ കേന്ദ്ര വാർത്താവിനിമയ മന്ത്രാലയം തയ്യാറാക്കി​​. ഇതുപ്രകാരം രാജ്യത്തെ വിവിധ അന്താരാഷ്​ട്ര മെയിൽ സേവന കേന്ദ്രങ്ങൾ അടച്ചു​പൂട്ടും. നിലവിൽ 30 കേന്ദ്രങ്ങൾ വഴിയുള്ള അന്താരാഷ്​ട്ര മെയിൽ – പാഴ്​സൽ സേവനങ്ങൾ അഞ്ചിടത്താക്കി ചുരുക്കും. ചെന്നൈ, മുംബൈ, ഡൽഹി, കൊൽക്കത്ത, ജയ്​പൂർ എന്നിവിടങ്ങളിലൂടെ മാത്രമാക്കാനാണ്​ നീക്കം.

കൊച്ചി വിമാനത്താവളത്തോട്‌ അനുബന്ധിച്ചുള്ള കൊച്ചിൻ ഇന്റർനാഷണൽ മെയിൽ സർവീസും കൊച്ചിൻ ഫോറിൻ പോസ്റ്റും ഇതോടെ ഇല്ലാതാകും. ഇനി ചെന്നൈ, മുംബൈ വഴി അയക്കണം. ഇത്‌ തപാൽ സേവനങ്ങൾ വൈകുന്നതിന്​ വഴിവയ്​ക്കും.

നിലവിൽ കേരളത്തിൽനിന്ന്​ വിദേശത്തേക്ക്​ അയക്കാനുള്ള തപാൽ ഉരുപ്പടികൾക്ക്​​​ 48 മണിക്കൂറിനകം കസ്​റ്റംസ്​ ക്ലിയറൻസ്​ ലഭിക്കുന്നുണ്ട്​. ചെന്നൈ, മുംബൈ എന്നിവിടങ്ങളിൽ 5 –7ദിവസം വരെയാണ്​ എടുക്കുന്നത്. രാജ്യത്ത്‌ ഏറ്റവും വരുമാനമുള്ള കേന്ദ്രമാണ്​ കൊച്ചിയിലേത്​. അഞ്ച്​ വർഷത്തിനുള്ളിൽ തപാൽ മേഖലയെ കൂടുതൽ വരുമാനം ലഭിക്കുന്ന രീതിയിൽ പരിഷ്കരിക്കുമെന്ന്​ അവകാശപ്പെട്ടാണ്​ എംപിഒപി നടപ്പാക്കുന്നത്​​. കാൽകിലോ ഭാരമുള്ള പാഴ്​സൽ അമേരിക്കയിലേക്ക്​ തപാൽ വഴി അയക്കാൻ 995രൂപയാണ്​ നിരക്ക്.​ സ്വകാര്യ കമ്പനികൾ ഇടാക്കുന്നത്​ 1600 മുതൽ 3000 രൂപവരെയാണ്​.