print edition ഹരിയാന സീറ്റ് കോഴ: കൊടിക്കുന്നിലിന്റെ പരാതിയിൽ കേസെടുത്ത് പൊലീസ്

തിരുവനന്തപുരം: യുഡിഎഫ് സർക്കാർ അധികാരത്തിലെത്തുന്നതിനുമുമ്പായി ഹരിയാന സീറ്റ് കോഴയിൽ കോൺ​ഗ്രസ് നേതാക്കൾക്കെതിരെ വെളിപ്പെടുത്തൽ നടത്തിയ ഗൗരവ് കുമാറിനെതിരെ കേസ് എടുത്ത് പൊലീസ്.

കോൺഗ്രസ് നേതാവും കൊടിക്കുന്നിൽ സുരേഷ് എംപിയുടെ പരാതിയിൽ കന്റോൺമെന്റ് പൊലീസാണ് ഹരിയാന മഹിളാ കോൺ​ഗ്രസ് മുന്‍ ജനറൽ സെക്രട്ടറിയുടെ ഭർത്താവായ ​ഗൗരവ് കുമാറിനെതിരെ കേസെടുത്തത്. ഗൗരവ് കുമാർ പണം തട്ടിയെടുക്കുകയെന്ന ഉദ്ദേശ്യത്തോടെ ഭീഷണിപ്പെടുത്തിയെന്നും വാർത്താസമ്മേളനം നടത്തിയെന്നുമാണ് പരാതി.

അതേസമയം കോൺഗ്രസ് നേതാക്കളുടെ സമ്മർദപ്രകാരമാണ് പൊലീസ് കേസ് രജിസ്റ്റർ ചെയ്തതെന്നാണ് വിവരം. ഹരിയാന നിയമസഭാ തെരഞ്ഞെടുപ്പിൽ സീറ്റ് വാഗ്ദാനം ചെയ്ത് പ്രിയങ്കാ ​ഗാന്ധി, എഐസിസി ജനറൽ സെക്രട്ടറി കെ സി വേണു​ഗോപാൽ, കൊടിക്കുന്നിൽ സുരേഷ് എംപി എന്നിവർ ഏഴ്‌ കോടി കോഴ വാങ്ങിയെന്നായിരുന്നു ഗൗരവ് കുമാറിന്റെ വെളിപ്പെടുത്തൽ. ഇവർക്കെതിരെ രേഖകൾ സഹിതം ഗൗരവ് കുമാർ സംസ്ഥാന പൊലീസ്‌ മേധാവിക്ക് പരാതി നൽകിയിരുന്നു. സംഭവം നടന്നത് ഹരിയാനയിലായതിനാൽ പൊലീസ് പരാതി അങ്ങോട്ടേയ്ക്ക് കൈമാറി.