ജിഎസ്ടി വർധന; ലോട്ടറി തൊഴിലാളികളുടെ
രാജ്ഭവൻ മാർച്ച് 15ന്

കൊച്ചി : കേന്ദ്രസർക്കാർ ലോട്ടറിയുടെ ജിഎസ്‌ടി 40 ശതമാനമാക്കി വർധിപ്പിച്ചതിൽ പ്രതിഷേധിച്ച്‌ കേരള ഭാഗ്യക്കുറി സംരക്ഷണ സമിതി 15ന് രാജ്ഭവൻ മാർച്ച് സംഘടിപ്പിക്കും. ലോട്ടറി ഏജന്റുമാരും തൊഴിലാളികളും പങ്കെടുക്കും. എറണാകുളത്തുചേർന്ന കേരള ഭാഗ്യക്കുറി സംരക്ഷണ സമിതിയുടെ സംയുക്ത സമരപ്രഖ്യാപന കൺവൻഷനിലാണ്‌ തീരുമാനം. 16 മുതൽ 18 വരെ ദിവസങ്ങളിൽ ജില്ലകളിൽ കേന്ദ്ര സർക്കാർ ഓഫീസുകളിലേക്ക് മാർച്ചും ധർണയും നടത്തും. തൊഴിലാളികളും ജനങ്ങളും ഒപ്പിട്ട നിവേദനം കേന്ദ്രസർക്കാരിന് സമർപ്പിക്കും. തുടർന്ന് പാർലമെന്റ് മാർച്ച്‌ സംഘടിപ്പിക്കും.

ടി കെ രാമകൃഷ്ണൻ കൾച്ചറൽ സെന്ററിൽ ചേർന്ന കൺവൻഷൻ ധനമന്ത്രി കെ എൻ ബാലഗോപാൽ ഉദ്‌ഘാടനം ചെയ്തു. കേരള ഭാഗ്യക്കുറി സംരക്ഷണസമിതി ചെയർമാൻ ഫിലിപ്പ് ജോസഫ് (ഐഎൻടിയുസി) അധ്യക്ഷനായി. സിഐടിയു സംസ്ഥാന വൈസ് പ്രസിഡന്റ് എസ് ശർമ, ഭാഗ്യക്കുറി ക്ഷേമനിധി ബോർഡ് മുൻ ചെയർമാൻ എം വി ജയരാജൻ, സംരക്ഷണസമിതി കൺവീനർ പി ആർ ജയപ്രകാശ്, എഐടിയുസി സംസ്ഥാന വൈസ് പ്രസിഡന്റ് കെ എസ് ഇന്ദുശേഖരൻനായർ, ലോട്ടറി തൊഴിലാളി ക്ഷേമനിധി ബോർഡ് ചെയർമാൻ ടി ബി സുബൈർ, വി ബാലൻ (എകെഎൽടിയു–- എഐടിയുസി), ജോർജ് കോട്ടൂർ (കെടിയുസി -എം), അൻസറുദീൻ (കെഎൽവിഎസ്‌യു), പേരൂർ ശശിധരൻ (എച്ച്എംഎസ്), പുരുഷോത്തമ ഭാരതി (കെഎൽഎഎ), മുരുഗേഷ് (കെഎൽഡബ്ല്യുഎ), ജെ ജയകുമാർ (കെഎൽടിഎ) തുടങ്ങിയവർ സംസാരിച്ചു.