ഗോവിന്ദച്ചാമിയുടെ ജയിൽചാട്ടം ; ഒന്നരമണിക്കൂർ നടന്നെങ്കിലും എത്തിയത്​ ജയിൽ പരിസരത്തുതന്നെ

കണ്ണൂർ

ജയിൽചാടി തമിഴ്​നാട്ടിലേക്കുള്ള ട്രെയിൻ പിടിക്കാൻ കണ്ണൂർ റെയിൽവേ സ്​റ്റേഷൻ​ ലക്ഷ്യമിട്ട ഗോവിന്ദച്ചാമി ഒന്നരമണിക്കൂർ നടന്നെങ്കിലും എത്തിയത്​ ജയിൽ പരിസരത്തുതന്നെ. സെൻട്രൽ ജയിലിനും പുതിയതെരുവിനും ഇടയിലെ പള്ളിക്കുളത്തെത്തിയ ഗോവിന്ദച്ചാമി വീണ്ടും കണ്ണൂരിലേക്ക്​ നടന്നതും ജയിലിനു മുന്നിലൂടെ.

വെള്ളി പുലർച്ചെ 4.15നാണ്​ ഗോവിന്ദച്ചാമി കണ്ണൂർ സെൻട്രൽ ജയിലിന്റെ ഇരുപതടി ഉയരമുള്ള മതിൽ ചാടി കടന്നത്​. കണ്ണൂർ റെയിൽവേ സ്റ്റേഷനിലെത്തി മംഗളൂരുവിലേക്കോ കോയമ്പത്തൂരിലേക്കോ കടക്കുകയായിരുന്നു ലക്ഷ്യം. റെയിൽവേ ട്രാക്കിലെങ്കിലും എത്തിയാൽ രക്ഷപ്പെടാനാകുമെന്നും ഇയാൾ കരുതിയിരുന്നു. ട്രെയിനിൽ ചാടിക്കയറാനാകുമെന്നതും ആത്മവിശ്വാസം കൂട്ടി. പുലർച്ചെ ഒന്നേകാലോടെ സെല്ലിൽനിന്ന്​ പുറത്തുകടന്ന ഗോവിന്ദച്ചാമി​ മൂന്നു മണിക്കൂറോളം ജയിലിനുള്ളിൽതന്നെ കുടുങ്ങി. ആദ്യം ചാടിയത്​ ക്വാറന്റൈൻ ബ്ലോക്കിലേക്കായിരുന്നു. രണ്ടാമതാണ്​ പുറത്തെത്താനായത്​. തടവുകാരുടെ തോർത്തും മറ്റും കൂട്ടിക്കെട്ടിയാണ്​ ജയിലിനുള്ളിലെ ഭാഗത്ത്​ മതിലിൽ കയറാൻ ‘കയർ’ ഉണ്ടാക്കിയത്​. പുറത്തെത്തിയത്​ പുതപ്പിൽ പിടിച്ചൂതൂങ്ങിയും.

പുറത്തെത്തിയ ഗോവിന്ദച്ചാമി ദേശീയപാത മുറിച്ചുകടന്ന്​ റോഡിലൂടെ റെയിൽവേ സ്റ്റേഷൻ ലക്ഷ്യമാക്കി നടന്നു. വഴിതെറ്റിയെത്തിയത്​ ജയിലിൽനിന്ന്​ ഒരു കിലോമീറ്റർ അകലെ പള്ളിക്കുളത്ത്​. ദിശമാറി റെയിൽവേ സ്​റ്റേഷന്റെ നേരെ എതിർഭാഗത്തേക്കായിരുന്നു ഇത്​. പള്ളിക്കുളത്തുനിന്ന്​ ഇയാൾ വീണ്ടും ജയിലിന്റെ ഭാഗത്തേക്ക്​ ദേശീയപാതയിലൂടെ​ നടന്നു. പുലർച്ചെ 5.55ന്​ പള്ളിക്കുളത്തെ സ്ഥാപനത്തിലെ സിസിടിവിയിൽ ഇയാൾ കണ്ണൂർ ഭാഗത്തേക്ക്​ നടക്കുന്നതിന്റെ ദൃശ്യങ്ങൾ പതിഞ്ഞിട്ടുണ്ട്​. ജയിൽ ചാടി ഒന്നരമണിക്കൂറിനുശേഷമാണിത്​. മനസിലാകാതിരിക്കാൻ കൈ തലയിലെ സഞ്ചിയിൽ ഒളിപ്പിച്ചുവച്ചാണ്​ ഇ‍ൗ ദൃശ്യങ്ങളിലുമുള്ളത്​. ഇതുകഴിഞ്ഞ്​ ഗവ. വനിതാ കോളേജിന്റെ എതിർവശത്തുള്ള പള്ളിക്കുന്ന്​ മൂകാംബിക ക്ഷേത്രത്തിന്റെ റോഡിലൂടെ നടക്കുന്ന ദൃശ്യങ്ങളും പൊലീസിന്​ ലഭിച്ചിട്ടുണ്ട്​.

ജയിൽ ജീവനക്കാരെ 
ചോദ്യംചെയ്​തു

ഗോവിന്ദച്ചാമി ജയിൽ ചാടിയ സംഭവത്തിൽ അന്വേഷകസംഘം ജയിൽ ജീവനക്കാരെ ചോദ്യംചെയ്​തു. അന്നേ ദിവസം ഡ്യൂട്ടിയിലുണ്ടായിരുന്നവരെയാണ്​ ചോദ്യംചെയ്​തത്​. വെള്ളി പുലർച്ചെ 4.15ന്​ ജയിൽചാടിയ ഗോവിന്ദച്ചാമിയെ ആറരമണിക്കൂറിനുള്ളിൽ പിടികൂടിയിരുന്നു.

കണ്ണൂർ സിറ്റി പൊലീസ്​ കമീഷണർ പി നിധിൻ രാജിന്റെയും എസിപി പ്രദീപൻ കണ്ണിപ്പൊയിലിന്റെയും മേൽനോട്ടത്തിൽ കണ്ണൂർ ട‍ൗൺ ഇൻസ്​പെക്ടർ ശ്രീജിത്ത്​​ കൊടേരിയുടെ നേതൃത്വത്തിലാണ്​ കേസന്വേഷിക്കുന്നത്​. അന്വേഷകസംഘം

കഴിഞ്ഞദിവസം സെൻട്രൽ ജയിൽ സൂപ്രണ്ട്​ ഉൾപ്പെടെയുള്ള ജീവനക്കാരെ ചോദ്യംചെയ്തിരുന്നു. പത്താം ബ്ലോക്കിലുള്ള ജയിൽ അന്തേവാസികളെയും തിങ്കളാഴ്​ച ചോദ്യംചെയ്​തു. ജയിലിനകത്തെ സുരക്ഷാവീഴ്​ചകൾ സംബന്ധിച്ച്​ തെളിവുകളും ശേഖരിച്ചു.