ഗദ്ദിക മേള എറണാകുളത്ത്‌ ; ആഗസ്‌ത്‌ 29 മുതൽ സെപ്‌തം. 4 വരെ

തിരുവനന്തപുരം

പട്ടികവിഭാഗം ജനതയുടെ തനത് കലാവതരണ, ഉൽപ്പന്ന പ്രദർശന, വിപണന മേള–- "ഗദ്ദിക’ ആഗസ്ത് 29 മുതൽ സെപ്തംബർ നാലുവരെ എറണാകുളത്ത് നടത്തും. അടിസ്ഥാന ജനവിഭാഗത്തിന്റെ ഉന്നമനം ലക്ഷ്യമിട്ടാണ് പട്ടികജാതി- പട്ടികവർഗ, -കിർത്താഡ്സ് വകുപ്പുകളുടെ ആഭിമുഖ്യത്തിൽ മേള സംഘടിപ്പിക്കുന്നതെന്ന് മന്ത്രി ഒ ആർ കേളു പറഞ്ഞു.

കേരളത്തിന്റെ തനത്‌ രുചികളും പാരമ്പര്യ ഉൽപ്പന്നങ്ങളും മേളയുടെ പ്രധാന ആകർഷണമാണ്‌. അന്യംനിന്നു പോകുന്ന പരമ്പരാഗത കലാരൂപങ്ങളും ഗോത്ര വൈദ്യവും നേരിട്ടനുഭവിച്ചറിയാനുള്ള അവസരമുണ്ടാകും. ട്രൈബൽ ഫ്രീഡം ഫൈറ്റേഴ്സ് മ്യൂസിയം മാതൃകയും ഒരുക്കും. പൊതുവിപണിയിൽ ലഭ്യമാകാത്ത കരകൗശല ഉൽപ്പന്നങ്ങൾ, വനവിഭവങ്ങൾ, ഒറ്റമൂലികൾ, അപൂർവ ഔഷധക്കൂട്ടുകൾ, ആവിക്കുളി തുടങ്ങി ആദിമ സംസ്‌കാരത്തിന്റെ വർണക്കാഴ്‌ചകൾ ഗദ്ദികയിൽ നിറയും. "ഏറുമാടവും’ സജ്ജീകരിക്കും. പട്ടിക വിഭാഗക്കാരായ സംരംഭകരുടെ വ്യത്യസ്ത ഉൽപ്പന്നങ്ങൾ 75 സ്റ്റാളുകളിൽ ലഭ്യമാക്കും. ശാസ്ത്ര- വിജ്ഞാന- വിനോദ പ്രദർശനങ്ങളും നടത്തും.

ദിവസവും വൈകിട്ട് സാംസ്കാരിക സമ്മേളനവും സെമിനാറുകളും കലാപരിപാടികളും അരങ്ങേറും. പട്ടികവർഗ വികസന വകുപ്പ് രൂപീകരിച്ചതിന്റെ സുവർണ ജൂബിലി ആഘോഷങ്ങളുടെ ഭാഗമായും ഗദ്ദിക മാറുമെന്ന് മന്ത്രി പറഞ്ഞു.